香江噚日（１５日）打完風，呢幾日將為香江帶來驟雨，好彩今朝（１６日）魚缸就繼續放晴！神州公布９月ＣＰＩ按年增１﹒６巴仙，連續８個月低於２巴仙，但ＰＰＩ升幅就擴大。而喺中資金融股同生發發（００３８８）等藍戰士支持之下，一朝早魚缸高開１８５點即刻創近十年高，之後仲曾經迫近２８８００點高位，走勢唔錯！
　　不過砵砵車就令人意外，市值約３５０億左右嘅長汽（０２３３３），早前因為孖屐傳出，公司會同寶馬合作而爆升逾１４巴仙後停賽，到今日先復賽。公司澄清，話未同寶馬簽任何法律文件。不過，雙方喺今年２月簽咗對ＭＩＮＩ品牌車合作嘅可行性探討同評估協議。不過長汽一開波無耐就飛起近７巴仙高見１２﹒０８銀，唔知孖屐係咪因為消化咗個消息冷靜咗，股價其後倒跌，仲一度穿咗１１蚊水平。
　　不過而家大市整體強勢，砵砵車後市應該仲可以繼續向上開車。相對起市值超過２０００幾億嘅吉利（００１７５），長汽市值細好多，而且前者市盈率近４０倍，長汽市盈率先８倍，短線咁計值博率係長汽高Ｄ。此外，吉利九月份已經炒起咗，長汽往後又可能繼續炒作同寶馬合作嘅消息，想短炒嘅缸友，選長汽比選吉利仲好，如果可以等１１蚊左右上車就最好啦！
　　
　　《編者按》本欄搜羅即市傳聞，惟消息未經證實，《經濟通》亦不保證內容之準確性。

全新節目《說說心理話》講述被情緒困擾真實個案，情緒病最終如何走出低谷？► 即睇