花旗國道指標指雙雙破頂，魚缸高開６２點後，雖然手機設備龍頭大阿哥瑞聲（０２０１８）、舜宇（０２３８２）齊齊腳軟軟，有幸大象（００００５）發威觸及８０銀高位，加上內銀股炒起，大市重踏兩萬九，並一度升近５００點，直逼２９３００。
　　睇番前兩日南下北水嘅數字，瑞聲、舜宇仍獲北水掃貨，預計短期內唔排除仲有反彈嘅空間；而大象甩前已連續兩日消失喺北水十大成交榜之上，但大象今日發力向上兼觸及８０銀大關，持有大象嘅缸友，記得要看看今日南下北水嘅統計數字，同埋花旗國聯儲局議息結果「出爐」後嘅聲明，先至再定個止賺「他屐」喇！
　　照目前個勢頭來睇，博客建議追入力受北水熱捧嘅股份，而內地錢莊係一個唔錯嘅選擇，特別係工商銀行（０１３９８）！事關佢喺上兩日累計共錄逾１４億銀「淨掃貨」，噚日
（１２日）仲增至近８億銀添呀，相信工行仍有望借呢個北水之勢再博炒上。
　　工行由月頭高位嘅６﹒１３銀，跌到去上周五（８號）５﹒８４銀嘅月內新低，當中曾被大和維持「負面」睇法，但今日內銀全線衝高，惟之後隨大行里昂唱好，畀佢「掃貨」評級，同埋７﹒５０銀「他屐」添。另外，祖國１１月新增人仔貸款踢高１﹒１２萬億人仔，遠勝孖屐預期添，於是工行就喺１００天線（約５﹒９４銀）附近搵到向上動力，而佢喺噚日受惠北水所帶動，一鼓作氣地升破埋６蚊大關，今日仲發力升至６﹒２５銀添，叻！
　　綜合以上而言，博客估計若工行喺短期內站穩６蚊的話，就有機會挑戰上月高位約
６﹒４３銀水平喇！
　　
　　《編者按》本欄搜羅即市傳聞，惟消息未經證實，《經濟通》亦不保證內容之準確性。

etnet榮獲HKEX Awards 2023 「最佳表現證券數據供應商」大獎► 了解詳情