19/07/2018 11:58

《魚缸博客》新保(1336)報喜帶旺街坊,憧憬齊齊造好坐實!

  聯儲局噚日公布的經濟褐皮書,同樣對花旗國經濟感到樂觀,加上大摩季績勝預期,金融股造好,為美股帶嚟支持,道指五連升。香江魚缸今朝就高開133點,報28251點。喺內險佬帶動之下,魚缸最多衝前過逾兩百點。可惜科技佬腳軟,之後要倒跌好慘慘。
  近排有唔少魚毛都輪住發盈喜,今次就輪到內險佬新保(01336),佢就預計中期純利同埋扣除非經常性損益後純利,均會按年大增八成,勁啊!仲刺激今日股價一開波就衝前,仲愈升愈有添。
  新保就話,主要受惠於傳統險準備金折現率假設變更嘅影響。舊年同期傳統險準備金折現率假設嘅變更增加保險合同準備金,而今年上半年該項假設嘅變更減少了保險合同準備金。同時,公司半年度嘅總投資收益較上年同期基本持平。
  唔單止係佢賣花讚花香,連瑞信都投下信心嘅一票,將佢嘅「他屐」由40銀上調到44銀,即使今日上晝最多升8巴仙至35﹒2銀,但都仍然有差唔多9蚊嘅潛在升幅,而評級就由「中性」上調至「優於大市」。
  雖然今日已經抽高咗唔少,不過都可以憧憬下,之後會唔會有其他街坊都發盈喜,有機會再帶動成班朋友一齊造好,現價可先入一注,有貨就可以坐多陣。

  《編者按》本欄搜羅即市傳聞,惟消息未經證實,《經濟通》亦不保證內容之準確性。

【你點睇】的士記分制將於周末生效,你認為該制度可否幫助的士提升服務質素?► 立即投票

魚缸博客
即時報價
全文搜索
Search
最近搜看
貨幣攻略
大國博弈
More
Share