近排大市蠱惑在於「陰跌」，唔覺唔覺又失守二萬八，而且更係牛證重貨區，資金都由大藍籌轉追細價股，而想穩穩陣陣小市民就要識得避險，公用股同消費股肯定不二之選。
　　維達國際（０３３３１）素有「贈品股」之稱，每次股東會都見到公公婆婆一袋二袋紙巾拎返屋企，可見係呢班長輩對維達幾咁長情。但呢隻股份點止長情咁簡單，維達公布半年度業績強勁，半年純利多賺三成，而次季毛利率更按季上升２﹒５個百分比至３１巴仙。而且管理層大派定心丸，有信心保持毛利率穩定，加上有花旗及野村兩間大行吹奏，目標價分別睇１６﹒２同
１７﹒２銀，對沉悶咁耐的股價表現絕對有刺激作用。
　　正所謂好股「有買貴，無買錯」，貿易戰打個稀巴爛都要用廁紙，維達業績一出日線圖已經彈兩支大陽燭上來，而且今日買盤都見有唔少大行追貨，可見股份絕對有吸引力。
　　但現價追貨略嫌貴左小小，睇下股份會唔會跌落２０天線（１３﹒３２５銀）再追亦不遲，向上望的話可參考年初均價大約１５﹒５銀左右，如果突破可以嘗試分注食胡再作部署。　

　　《編者按》本欄搜羅即市傳聞，惟消息未經證實，《經濟通》亦不保證內容之準確性。

etnet榮獲HKEX Awards 2023 「最佳表現證券數據供應商」大獎► 了解詳情