《笑傲缸湖》早前網易創辦人丁磊，喺浙江烏鎮世界互聯網大會過後，搞咗個網絡科技業大佬飯局，出席嘅猛人當中包括ＱＱ（００７００）老細馬化騰、百度嘅李彥宏、小米嘅雷軍、京東嘅劉強東等等，但阿里巴巴嘅馬雲就拒絕赴宴。如果馬雲赴宴，連同馬化騰，大家就可以睇到神州最具價值嘅兩大品牌創辦人有咩火花擦出啦！　　話ＱＱ同阿里巴巴係神州最具價值嘅品牌，係有根有據嘅。胡潤排行榜出爐，當中阿里旗下嘅淘寶排第１，而ＱＱ就排第２，兩者品牌價值分別達４５００億人仔同３５００億人仔。淘寶就正如馬雲喺《功守道》入面嘅角色一樣，係武林「冧把溫」。　　頭十名入面，阿里陣營同ＱＱ陣營各佔咗兩席，ＱＱ旗下嘅微信排行第５，阿里旗下嘅天貓就排第１０。馬明哲嘅平保排第９。換言之，「三馬」領導十大品牌嘅一半。　　各大品牌當中，品牌價值平均升幅比較大嘅行業，分別係生活服務業、酒類業、房產業同科技業。呢幾個行業嘅冠軍分別有滴滴出行、貴州茅台、恆大、ＱＱ。盈盈記得，貴州茅台、恆大、ＱＱ好似今年都升咗好多！唔知呢個排行榜，可唔可以做到下年魚缸嘅尋寶圖呢？《任盈盈》

　　－－－－－－－－－－－－－－－－－－－－－－－－－－　　２０１７年最具價值神州品牌十強　　品牌價值（億人幣）　　－－－－－－－－－－－－－－－－－－－－－－－－－－　　１　　淘寶　　　　　　　　　　　　　４５００　　２　　騰訊　　　　　　　　　　　　　３５００　　３　　百度　　　　　　　　　　　　　３１５０　　４　　工行　　　　　　　　　　　　　３１００　　５　　微信　　　　　　　　　　　　　２２００　　６　　建行　　　　　　　　　　　　　２０００　　７　　中移動　　　　　　　　　　　　１９２０　　８　　貴州茅台　　　　　　　　　　　１９００　　９　　平保　　　　　　　　　　　　　１５１０　　１０　天貓　　　　　　　　　　　　　１５００　　－－－－－－－－－－－－－－－－－－－－－－－－－－

　　《編者按》本欄搜羅即市傳聞，惟消息未經證實，《經濟通》亦不保證內容之準確性。

全新節目《說說心理話》青少年不可以戀愛！？真實個案講述驚心動魄經歷► 即睇