《笑傲缸湖》花旗國人鍾意快餐就眾所周知喇，雖然喺香江嘅大型連鎖快餐店一隻手就數得哂，不過喺花旗國就唔同喇。除咗我哋熟悉嘅麥當當、肯德基、漢堡王等，仲有非常多唔同嘅品牌，所以龍頭大佬麥當當都唔係完全獨大！　　最近佢哋為咗爭取更多市場份額同埋維持業務增長，麥當當決定將首要目標定為做「炸雞王」，更將行動代號定為「更好嘅雞（Ｂｅｔｔｅｒ　Ｃｈｉｃｋｅｎ）」！　　長久以來麥當當嘅雞都只有麥樂雞、雞翼同埋漢堡包夾住嘅雞扒，佢哋都知道咁樣係唔夠，所以立志要提升其雞類食品種類，亦會提升質素，包括：停止使用抗生素雞，同埋唔再喺麥樂雞入面加人造防腐劑，更加推出同對手福來雞（Ｃｈｉｃｋ－ｆｉｌ－Ａ）類似嘅南式（Ｓｏｕｔｈｅｒｎ－ｓｔｙｌｅ）三文治。　　根據花旗國農業部調查顯示，舊年花旗國人食最多嘅肉就係雞，每年人均消費９１﹒７磅，足足多過排第二嘅牛肉６２巴仙。加上，雞肉比起紅肉更加健康，喺呢個愈來愈多人注重健康嘅時代，雞肉亦係更多人嘅選擇。唔怪得之，麥當當會將雞放到戰略發展首位喇！　　不過，如果講起炸雞，目前盈盈始終比較偏好山德士上校嘅肯德基喇。希望麥當當可以快ｄ推出唔同嘅雞類食品，等盈盈都可以有多啲選擇喇！《任盈盈》

　　《編者按》本欄搜羅即市傳聞，惟消息未經證實，《經濟通》亦不保證內容之準確性。

【etnet 30周年】多重慶祝活動一浪接一浪，好禮連環賞！ ► 即睇詳情