《笑傲缸湖》唔知大家記唔記得自己１１歲嘅時候做緊咩呢？數下手指，１１歲盈盈仲讀緊小學，可能仲係日日放學去公園玩，同埋去行文具店買靚靚筆。不過根據探子回報，花旗國嘅小朋友細細個就開始炒虛擬貨幣，最細嗰位竟然正正只得１１歲，即係小學都未畢業！　　呢細路嚟自花旗國Ｏｌｄ　Ｇｒｅｅｎｗｉｃｈ一個普通家庭，叫做佐治（Ｇｅｏｒｇｅ　Ｗｅｉｋｓｎｅｒ）。佐治每星期有５﹒５美金嘅零用錢，不過佢好似覺得唔係太夠用，所以佢喺舊年將幫屋企手賺返嚟嘅２００美金，全數拎哂去買比特幣。　　佐治仲話：「會全情投入去投資虛擬貨幣，因為幫屋企做家務根本就賺唔到大錢。」最終佢喺過去嘅１２月，剛好喺比特幣開始急瀉前獲利，成功賺到本金嘅三倍，勁呀！之後仲將賺返嚟嘅５００美金，轉到去炒比特幣對手以太幣。　　佢唔係唯一一位炒虛擬貨幣嘅「神童」，仲有唔少其他嘅例子出現。真係估唔到，原來依家細路仔咁細個就開始接觸投資。不過，時移世易，以前不少都會聽到嘅「少年股神」可能已經ｏｕｔ喇，「少年虛擬貨幣神」先係潮流！《任盈盈》

　　《編者按》本欄搜羅即市傳聞，惟消息未經證實，《經濟通》亦不保證內容之準確性。

全新節目《說說心理話》青少年不可以戀愛！？真實個案講述驚心動魄經歷► 即睇