《笑傲缸湖》好多時候選擇ｃａｌｌ車或者坐的士，除咗因為方便之外，都可能因為乘客嘅狀態，唔係好方便迫巴士地鐵，例如：ｈａｐｐｙ　ｈｏｕｒ過後嘅醉酒漢。呢類人真係好易醉酒鬧事，更有機會襲擊司機添。針對呢類乘客，Ｕｂｅｒ諗咗個對策，仲申請埋新專利。　　　呢項專利就係透過人工智能，分析乘客用Ｕｂｅｒ手機應用程式時候的行為模式，包括打字速度同準確度、行路嘅速度等等，去判斷乘客有無飲醉。分析嘅結果配合埋ｃａｌｌ車嘅時間同地點等資訊，要知道乘客係咪飲醉，就唔係難事喇！　　不過其實最終接客與否，都係睇司機嘅決定。除咗完完全全地取消訂單之外，都可以將上車嘅地點擺遠少少，等乘客可以行多幾步清醒吓。至於醉得太勁嘅乘客，則有機會會同經驗豐富Ｄ嘅司機配對，始終佢哋都較了解點樣去處理突發情況，但當然都有機會暫時被禁止坐Ｕｂｅｒ喇。　　雖然呢類功能都仲存在唔少隱憂，而Ｕｂｅｒ都仲未正式透露，會唔會正式放入個Ａｐｐ到，不過對司機會多Ｄ保障，都係好事嚟嘅。始終司機先係Ｕｂｅｒ最重要嘅財產嘛！《任盈盈》

　　《編者按》本欄搜羅即市傳聞，惟消息未經證實，《經濟通》亦不保證內容之準確性。

etnet榮獲HKEX Awards 2023 「最佳表現證券數據供應商」大獎► 了解詳情