《笑傲缸湖》全球電動四個轆一哥特斯拉（Ｔｅｓｌａ）近排真係禍不單行，繼老細兼創辦人馬斯克（Ｅｌｏｎ　Ｍｕｓｋ）之前喺推特（Ｔｗｉｔｔｅｒ）上面口出狂言話會私有化特斯拉後，公司股價即時坐火箭爆升。雖然咁樣會令到股東相當Ｈａｐｐｙ，但呢一著就令公司一直被花旗國證監會調查，公司一身蟻搞到唔少高層都雞咁腳走。　　特斯拉近排又有一單唔係咁好嘅新聞，話說比利時一間大學幾個研究員，只係用上一個價值６００蚊美金，即係大約４８００蚊港紙嘅微型計算同無線電裝置，成功入侵特斯拉旗下車型Ｍｏｄｅｌ　Ｓ，而且仲可以撻著埋引擎，而特斯拉嘅砵砵車又同時擁有無人駕駛功能，豈不是可以遙距偷車。　　呢班咁西利嘅研究員發現Ｍｏｄｅｌ　Ｓ嘅電子車匙裝置可以輕易複製後，就試吓可唔可以解鎖部車，原來係可以架，而且解鎖嘅過程１分鐘都唔使，可以做到神不知鬼不覺，連車主都唔知。研究員仲將成段「偷車過程」擺上網，仲列出三個步驟，第一，首先「賊仔」就會拎住個偷車裝置行近架車度讀取資料，而成個過程五秒都唔使，然後就可以定位條真車匙位置；第二，靜雞雞行近車主大約只有幾吋距離左右，再用個裝置複製並掃描車主嘅車匙；第三，「賊仔」攞晒Ｄ資料後就大功告成，然後就可以好「順利」咁揸走部車。　　不過，呢班研究員當然唔會將佢地「研究成果」用係犯罪上面啦，而係將呢個保安漏洞話畀特斯拉知，而特斯拉仲畀咗佢地一筆１萬蚊美金嘅獎金。其實，由於特斯拉砵砵車有好多功能都係電子控制，所以一早就有駭客成功入侵，一位嚟自通用汽車嘅自動駕駛安全首席架構師就講過可以喺３０公尺範圍內，用藍芽傳輸侵入特斯拉砵砵車，仲話可以透過網際網路或互聯系統入侵。　　道高一尺，魔高一丈，有人就擔心，依家嘅駭客咁犀利，萬一被恐怖份子利用，一嚟又唔使犧牲人命，二嚟成本又咁低，入侵咗之後可以用嚟進行恐怖襲擊。不過，既然有駭客，就會有系統安全工程師，而事實上，呢班工程師都有好多對策應付駭客，所以又唔使點驚嘅。《任盈盈》

　　《編者按》本欄搜羅即市傳聞，惟消息未經證實，《經濟通》亦不保證內容之準確性。

【你點睇】的士記分制將於周末生效，你認為該制度可否幫助的士提升服務質素？► 立即投票