《笑傲缸湖》萬眾期待嘅「果」迷大會終於圓滿落幕，但一眾果粉睇完個大會之後，就只係大叫一聲「好貴啊」！因為呢一次蘋果出咗兩款心機ＸＳ同ＸＲ，雖然ＸＲ買６４９９銀，但作為專業果粉梗係買最高規格ＸＳ　ＭＡＸ嘅５１２ＧＢ版啦！但望望個價錢，１２４９９銀，痛到呢﹒﹒﹒﹒﹒﹒　　之但係，作為一個專業嘅香港人，就知道「唉瘋」其實唔係買嚟用，而係嚟炒！所以一有新機出就好似有新股上市咁個個衝埋去爭，但呢期新股就無咩斬獲，一齊睇睇有「旺角華爾街」之稱嘅「先達廣場」先！　　據科技雜誌引述「先達大行」「數碼匯」嘅分析員阿勇嘅意見，ＸＳ　Ｍａｘ可以炒起嘅機會較大，預料可以炒高２千至３千銀，ＸＳ唔太建議入手。另一間大行「萬通」嘅分析員Ｒｉｃｋｙ同樣都認為ＸＳ　Ｍａｘ可以炒得起，首批甚至可以炒高４千至５千蚊！　　點解「唉瘋」可以炒得咁勁，有分析指，主要因為受到中港差價影響，其中兩地價格相差嘅幅度達１６巴仙，當中ＸＳ　ＭＡＸ兩地價格更差距１７﹒２巴仙！　　目前個「大市」未見有太大炒作，因為網上一片謾罵聲，都係覺得新唉瘋無新意啦、價格太高啦、ＸＲ版太雞肋啦等等等等。而睇個勢，唉瘋似乎開始放棄低端市場，因為平價版ＳＥ已經停售，唉瘋７最平已經減價到３８９９銀。　　本地論壇班巴打認為，舊版唉瘋比新版性價比更高！只要你唔Ｕｐｄａｔｅ個系統就咩事都無！所以都係建議大家買舊版好似比較著數！嗱嗱嗱，睇完蘋果機，接住就睇下「三叔」會唔會有咩新機啦！《任盈盈》

　　《編者按》本欄搜羅即市傳聞，惟消息未經證實，《經濟通》亦不保證內容之準確性。

全新節目《說說心理話》青少年不可以戀愛！？真實個案講述驚心動魄經歷► 即睇