《古臣周記》星期日（２３日）風暴襲港，天文台「果斷」發出八號訊號，結果只係維持咗４個鐘，成為史上第三短命嘅八號波。原本ｐｌａｎ好晒節目但畀佢玩到陀陀擰嘅古臣，都不禁慨嘆「李氏力場」果然威力無窮。

＊電能派特息，一次過滿足三個願望＊

　　李超人厲害之處，又點只天文氣象吖，佢喺股市樓市先至真正呼風喚雨！早日電能（００００６）放榜，中期賺多１６巴仙已經令孖屐眼前一亮，更驚喜嘅係豪派特別息每股７﹒５元。背後原因之唔係想「泵水」畀長建（０１０３８），持有電能近３９巴仙股權嘅長建原本手上ｃａｓｈ只剩４７﹒５億，今次藉電能中期息同特息，足足「抽水」６８﹒６億，夠晒彈藥下半年繼續併購。　　其實，李超人早就吼住電能２０１４年分拆港燈（０２６３８）之後套現嘅巨額現金，２０１５年因而提出電能同長建合併，但因為小股東唔滿意換股比例偏低而失敗。今次電能派特息，可以支援長建發展，股民有息收，股價又憧憬遲吓再派息而炒高，一次過滿足三個願望，咪大家ｈａｐｐｙ囉。只可惜古臣持倉嘅長和（００００１）有得睇冇得食，進展依舊緩慢，不過既然下星期四（３日）就放榜，又即管按兵不動睇吓到時有冇驚喜啦。

＊習大大拍板限併購，民企夠晒濕滯＊

　　李超人另一各大富商未必學到嘅地方，就係佢嘅政治手腕。旗下企業近年不斷變賣中港資產、大舉轉向歐洲澳洲投資，甚至有密件披露佢早年曾經想攞英國公民資格，但阿爺最多都只係透過官媒批評兩句。　　相反，近期神州嘅名星民企就濕滯得多，有傳整頓海外併購、限制萬達、復星等等融資都係由國家主席習近平親自拍板。究竟係因為「走資」走得太過份，定因為民企極速壯大影響到中央、國企對經濟嘅控制，就不得而知了。

　　表列截至７月２６日止投資組合表現：

　　股份　　　　　股數　　　　　　　買入價　　　　　　現價　　　　　　　總值　　－－－－－－－－－－－－－－－－－－－－－－－－－－－－－－－－－－－－－－－－　　港股：　　長和　　　　５００股　　　　　９９﹒６元　　　１０１﹒１元　　　　５０５５０元　

　　美股：　　Ｔｅｓｌａ　　　２股　　　　　３１６美元　　　３３９﹒６美元　　　６７９﹒２美元　　　　　　　　　　　　　　　　　　　　　　　　　　　　　　　　＃（約５３０４港元）　　－－－－－－－－－－－－－－－－－－－－－－－－－－－－－－－－－－－－－－－－　　＃以美電７﹒８０９９計算

　　股票市值　：５５８５４元　　剩餘現金　：２１９３４元　　組合淨值　：７７７８８元

　　組合本月收益表現：＋　２﹒４％（截至上月底止組合淨值：７５９８０元）　　組合累計收益表現：＋１９﹒７％（本金６５０００元）（２０１６年８月開倉）

　　＊數據截至今日１１：３０ａｍ

etnet榮獲HKEX Awards 2023 「最佳表現證券數據供應商」大獎► 了解詳情