• 恒指
  • 18,247
  • -11
  •  大市成交 1,243億
  • 期指(夜)
  • 18,303
  • +35
  • 高水56
  • 國指
  • 6,389
  • +8
  • 紅籌
  • 3,509
  • +14
  • 科指
  • 3,698
  • -6
  • 上證
  • 2,749
  • +12
  •  成交 2,352億
12/09/2018 17:25

《小傳日記》六連跌陰乾,悶死個魚缸;藥佬急肚瀉,賭仔齊損手!

  《小傳日記》隔晚花旗國個市好似一齊開派對咁,三大指數都向上發展,蘋果個科技大會就喺香江時間13號凌晨舉行,相信唔少果粉今晚捱通宵都會睇埋佢,所以蘋果隨晚(11日)股價升咗2個幾巴仙,而個油價都因為花旗國打風嘅關係而抽高,間接推動油價,埃克森美孚、雪佛龍股價都幾靚仔,咁就過咗個輕鬆星期二。  今日(12日)嚟到一個禮拜最難捱嘅星期三,個魚缸今早都曾經高開過40點,依然陰啲陰啲咁跌落去,恆指殺到落26219立即跌幅收窄,藥品股、濠賭股全部都跌到傷晒,個魚缸全日跌77點或近0﹒3%,報26345點,而且見六連跌累積跌幅達1628點,全日主板成交逾948億銀。  國貨方面就跣低94點或近1巴仙,收10238點;神州滬市就輕輕下跌8點或0﹒3巴仙,報2656點。  藍戰士今日就榮辱互見,小象(00011)升近2巴仙,報205銀。AIA(01299)今日都略見反彈漲超過1巴仙,報62﹒8銀。新地(00016)彈逾1巴仙,報113銀。潤電(00836)瀉近3巴仙,報13﹒16銀,受累8月售電量減少。QQ(00700)牛皮,升4亳子報308﹒4銀。中移動(00941)今日跌逾半個巴仙,報75﹒75銀。  *花旗國颶風油股又作動,跌市買公用港鐵又受捧*

  呢幾日香江個個都玩緊個「山竹」颱風圖,花旗國個邊都唔弱,都有超級颶風「佛羅倫斯」,總之一有任何天文異象,油價就會跟住抽升,隔晚布油同紐約油都升逾2個巴仙,間接推高埋今日「三桶油」同油服股。中海油(00883)今日漲1巴仙,報14﹒16銀。中石油(00857)升近半個巴仙,報5﹒76銀。中石化(00386)亦升兩格報7﹒52銀。中海油服(02883)飛起逾3巴仙,報7﹒44銀。昆侖能源(00135)今日微漲近1巴仙報8﹒39銀。  大市呢種陰跌式下挫真心令人怕怕,醒目嘅缸友應該轉晒倉入公用股避險,而今日港鐵(00066)都升到犀非利,主要因為何文田站開始接收意向書,有分析指二期項目每呎樓面地價約2萬2千銀,哇!計埋建築費同利息成本,分分鐘賣四萬銀一尺都有可能!所以港鐵今日漲近3巴仙,報40﹒75銀,升幅為藍戰士中冧把溫。其他公用股都有人追貨,中電(00002)漲逾2巴仙,報94﹒55銀。煤氣(00003)飛起近1巴仙報15﹒68銀。港燈(02638)今日漲逾半個巴仙,報7﹒91銀。

*手機佬悲傷衣錦唔還鄉,豬肉佬發愁缸友唔應酬*

  手機設備佬今日頭耷耷,上星期五晚(7日)公布咗8月出貨數據嘅舜宇(02382)喺寶島競爭對手大立光電手中搶走咗手機鏡頭市場嘅份額,高盛睇好佢架,認為佢業績有望達至今年預測區間嘅上限添!今日微微踢高約半個巴仙,報87﹒75銀。通達(00698)同丘鈦(01478)就齊齊上演「You jump,I jump」嘅橋段,分低分別走低超過6巴仙報0﹒9銀及跌超過1巴仙報5﹒05銀,可憐豬!瑞聲科技(02018)早前遭高盛降「他屐」至137銀,但喺仲維持佢買入評級。全日就微微踢起唔夠1巴仙報77﹒85銀。  噚日祖國湖南省政府開咗個有關非洲豬瘟疫病防控嘅電像會議,要部署相關嘅防控工作咁話。豬肉佬今日就慘啦,即使中金「十卜」萬洲(00288)下年業務會反彈,兼表示豬肉價格自從5月以嚟已經反彈超過三成,可憐嘅佢全日都喺走低近2巴仙報5﹒32銀。慘!超大現代(00682)同雨潤(01068)同為苦命人,分別仆低近5巴仙同超過1巴仙,分別報8﹒1仙及0﹒77銀。中糧肉食(01610)亦唔得缸友們歡心,走低近1巴仙報1﹒16銀。普甜(01699)下滑超過1巴仙,報0﹒35銀。

*小超出手後天然氣終購,長和長建升股民又見勝*    小超接棒之後頻頻出手,似乎係想用行動證明自己,所以長和系近日動作可以話多籮籮,除左不斷回購支持系內股價,亦密密做無停手周圍收購資產,繼長和(00001)喺上星期五(7日)完成收購意粉國嘅電訊營運商Wind Tre餘下50%嘅股權之後,今日再有好消息,成功同袋鼠國官方傾掂數,由長實(01113)、長建(01038)同電能(00006)合組而成嘅財團,獲淮以129﹒79澳銀購買喺當地嘅天然氣管道商APA集團,但條件就係同意出售財團喺西澳洲資產,消息一出,長和系4隻主要股份逆市做好,無他嘅,之前收喺收購Wind Tre嘅時候,各大行都已經唱好話,二來之前「孖屐」話收購機會唔大,今次超「孖屐」預期,股價當然有表現啦,小超你係得嘅!長和收報89﹒9銀,升逾2巴仙係表現第三佳藍戰士;長建收復60銀關口,收報近2巴仙,報60﹒3元;長實報55﹒65銀,升亳半子;電能升近半個巴仙,報55﹒55銀。 *濠賭被唱淡大行都斬纜,神州再出手醫藥股見愁* 

  無錯啊,德銀公布大幅下調全線濠賭股嘅「他屐」同評級,大摩亦發表研究報告話,該行可能調低澳門博彩股嘅盈利預測,佢認為從歷史估值範圍嚟睇,博彩股仍然算平,不過就要盈利預測企穩後,股價先會回升。而大摩就吹起摩笛,話偏好股份有永利馬交(01128),同美高梅(02282),不過人仔貶值、房地產交易量、貨幣供應量同GDP在內嘅宏觀驅動因素都呈現下行趨勢,預計馬交博彩股今年盈利預測需要向下修正,所唔使講又係你跌啊馬交賭佬!銀娛(00027)今日收市報45﹒7銀,跌近5個巴仙;永利馬交報17﹒12銀,跌逾6個巴仙;美高梅再插近7個巴仙,收報11﹒16銀;澳博(00880)報6﹒77銀,走低近3個巴仙;金沙(01928)報31﹒7銀,跌逾2個巴仙。  神州繼網遊、殯儀同建材之後出手,話醫療保障局將會用價低者得方式購藥,事源昨日喺上海舉行嘅座談會,會上介紹神州將來採購藥物嘅方法,神州藥佬嘅產品價格,將會有40巴仙到10巴仙嘅跌幅,而方案所涵蓋嘅地區,至少佔據了神州藥佬60巴仙嘅藥品市場銷售額,所以唔使講啦,一眾藥佬今日肚瀉式下挫,其中藍戰士新貴神州生物製藥(01177)急挫逾14巴仙,剩返7﹒5銀,成為最差表現嘅藍戰士;石藥(01093)亦質低近10個巴仙,報16﹒7銀;神州中藥(00570)全日唔見2個巴仙,報4﹒94銀;康哲藥業(00867)插近12個巴仙報11銀;白雲山(00874)無咗近6巴仙,報25﹒35銀;歌禮(01672)奏悲歌,跣低逾2個巴仙收7﹒56銀。請請!

   《編者按》本欄搜羅即日熱門傳聞,惟消息未經證實,《經濟通》亦不保證內容之準確性       本文只供參考之用,並不構成要約、招攬或邀請、誘使、任何不論種類或形式       之申述或訂立任何建議及推薦,讀者務請運用個人獨立思考能力自行作出投資       決定,如因相關建議招致損失,概與《經濟通》、編者及作者無涉。

【你點睇】本港主要銀行跟隨美聯儲減息,你對樓市前景有否信心?► 立即投票

備註︰

即時報價更新時間為 23/09/2024 17:59

港股即時基本市場行情由香港交易所提供; 香港交易所指定免費發放即時基本市場行情的網站

股票
即時報價
全文搜索
Search
最近搜看
貨幣攻略
大國博弈
More
Share