《小傳日記》市況陰晴不定，令好多計劃上市嘅公司都舉旗不定，巴巴（０９９８８）叫停分拆，小小超ＦＷＤ又話要等陣先，而送嘢嗱嗱聲嘅Ｌａｌａｍｏｖｅ喺上市方面就明顯嗱嗱聲唔倒，繼上年兩次遞表之後，呢幾日又再向聯交所敲門遞表。　　過咗業績期，Ｌａｌａｍｏｖｅ阿媽拉拉科技份招股書都ｕｐｄａｔｅ咗２０２３年業績數據，經調整純利按年轉虧為盈賺３﹒９１億美元，收入１３﹒３４億美元按年多接近２９％，毛利增４７％至８﹒１７億美元，毛利率由２０２２年５３﹒７％增至２０２３年６１﹒２％。整體成績比起上年仲蝕緊錢嘅最大對手Ｇｏｇｏｖａｎ阿媽快狗（０２２４６）好得多。　　招股書入面Ｌａｌａｍｏｖｅ雖然暫未提到集資後資金喺用途上嘅百分比，但集資用途上面第一項提到，就係用於鞏固同城貨運市場嘅領先地位，希望喺未來三至五年，擴大滲透率去到更多具有增長潛力嘅二、三線城市，集中喺河北、河南同江西。更加詳細就係，資金主要用於加大線上線下推廣，並且係用於招攪同激勵司機。　　可以見到Ｌａｌａｍｏｖｅ上市主要都係集資發展下沉市場，大家都知發展下沉市場意味上層市場嘅飽和，希望搶先一步入主次要市場，即係話Ｌａｌａｍｏｖｅ目前業務都急住擴充。而神州市場入面既要同Ｇｏｇｏｖａｎ展開打吡戰，又要同上面美團（０３６９０）、順豐、中通（０２０５７）打過，所以「天下武功，唯快不破」，愈快集到資愈好，先會大約一年時間內三次向聯交所遞表。　　有公司嫌市況唔好唔上市住，有公司就硬住頭皮都要上市，證明貨運行業競爭都係熱哄哄，無論送貨定擴充都係最緊要「快」，請請！　＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

【與拍賣官看藝術】東南亞藝術市場是下一個熱點？一探各地獨特及吸引之處！► 即睇