《小傳日記》老老實實，香江魚缸之前升咗咁多，缸友都預咗今個月會向下調整。不過，估唔到消化完息魔降臨後，花旗國又因為稅改方案有阻滯，搞到道指噚晚終斷五連升，收低７６點報２４５０８。　　外圍氣氛唔多好，香江魚缸今早（１５日）都跟隨低開１６６點，點知低處未算低，股王ＱＱ（００７００）質低逾２巴仙穿３９０銀，埋單收３８９銀；仲有中資金融股都被拋售，平保（０２３１８）、工行（０１３９８）等近日焦點股都碌番晒落去，唔見大約２巴仙，分別收７７﹒４銀及６﹒１４銀。嚇到恆指最多蒸發４２７點至２８７３８，穿過１０天線（約２８８１４）。恆指散場仲要唔見３１８點報２８８４８，５０天線（約２８８５６）都一樣守唔住。國指當然難逃一跌，插低１６５點報１１３６５。　　魚缸弱咗咁多，缸友嚇到急急掟貨，全日成交急增近１９巴仙至１２６５億左右。　＊利豐有大刁大和升目標，豪爽派特息無貨心戚戚＊　　　利豐（００４９４）呢幾年無論係業績抑或股價都Ｋｅｅｐ住冇運行，呢位本地薑嘅收入雖然由２０１３年開始就冇再升過，但缸友原來一早就有先見之明，喺２０１１年頭已部署空軍，利豐由山頂位２３﹒３５５銀開始碌落山，跌到去２﹒６４銀先開始彈返上嚟，跌幅大嗱嗱有接近九成！不過，利豐頹咗咁耐終於有翻身嘅一日，喺上個禮拜四（７日），一向都唱淡利豐嘅瑞銀竟然大轉軚，唱好佢持續Ｃｕｔ成本下，盈利能力有望快Ｄ恢復，將評級由中性升到去「掃貨」，翌日（８日）即大裂口急升。　　好消息又點止一單，利豐喺噚日（１４日）收市後話要賣走家具、毛衣同美容產品業務，單「刁」嘅作價有成１１億美金。之後利豐仲話會拎其中嘅５﹒２億美金出嚟豪派特別息，每股派６﹒１４美仙。大和出言力撐，話呢單刁可以強化核心業務，「他屐」升到去４﹒７銀。缸友收到風後即爭崩頭掃貨，公仔圖即出現多一個上升大裂口，全日逆市爆升近８巴仙，報４﹒４３銀，仲喺近兩年高位４﹒４７銀插旗添。　　同系嘅股份都有得搭順風車，利邦（００８９１）彈起近６巴仙，報０﹒７１銀。但利標（００７８７）就無升跌，利亞零售（００８３１）就唔見近１巴仙。　＊融創突抽水有貨流眼淚，郵儲行被掟嚇到面青青＊　　　噚日祖國內房先拍住香江磚頭佬一齊領軍，點知融創（０１９１８）就傳來壞消息，公司宣布折讓近１２巴仙配股，佔擴大後股本逾５﹒７巴仙，大拿拿淨籌７８億銀，有貨缸友當然唔Ｈａｐｐｙ啦，決定掟貨表示不滿，今日融創就受重傷，蒸發近１１巴仙報３１﹒５５銀，成交高達１１７億銀添！　　郵儲銀行（０１６５８）都有壞消息，今朝開市前已經錄得佔Ｈ股發行股本３﹒７巴仙嘅大手，涉及近３０億銀，後尾有消息指，原來郵儲行有一名機構投資者沽咗貨畀１０個投資者，而涉及股數就係３﹒７巴仙！結果唔使問，郵儲行收市要瞓低近５巴仙報４﹒０４銀喇。　＊瑞聲未跌完舜宇腳軟軟，賭股逆市升銀娛最精靈＊　　　自從今年嘅手機重頭戲「唉瘋Ｘ」同「唉瘋８」出咗台後，缸友好似已經冇咩值得期待，加上唔少手機設備佬今年以嚟都升咗唔少，唔少缸友都趁機食胡掟貨散水，兩大龍頭瑞聲（０２０１８）同舜宇（０２３８２）都同樣喺１１月頭破頂後插水，瑞聲就喺１８５蚊山頂位碌落嚟，兼且到而家都仲未停，今日就跣低超過１巴仙，收１３９﹒４銀，險守１００天線（１３８﹒４７銀），由山頂位計累跌咗近兩成半。舜宇就喺高位１５２﹒６銀開始腳軟，到今日股價已經跌到去１０２銀，加加埋埋插咗逾３３巴仙。　　馬交賭收持續反彈，迎日仲有消息話，六大馬交博彩佬將會一齊搞發財巴（酒店及賭場客運專車），雖然唔算係Ｄ重大利好消息，但今日相當硬淨，即使魚缸一度急插咗超過４００點，龍頭銀娛（０００２７）都好省鏡，抽高近２巴仙報６１﹒８５銀，為表現最勁藍戰士；永利馬交（０１１２８）同新濠國際（００２００）分別逆市跳起近２巴仙及逾１巴仙，收報２４﹒６５銀同２２﹒７５銀。　＊醫藥佬炒完金斯瑞心酸，ＡＳＭ反擊中芯亦得戚＊　　　唔少醫藥佬近呢幾日都搶晒風頭，並且連續幾日破頂，搞生物科技製藥嘅金斯瑞（０１５４８）自８月底開始，股價就坐咗上火箭，今日就最高上到去１４﹒９銀山頂位，最多升咗超過半成。不過高處不勝寒，最終倒跌近兩巴仙，報１３﹒９２銀，但由８月底時５蚊都未夠嘅水平，升到去而家呢個價位，短短幾個月已經有近兩倍升幅，勁！　　街坊中國生物製藥（０１１７７）一樣相當把炮，已經連續四日破頂，但最終都喺高位腳軟碌返落嚟，今日跣低逾４巴仙，報１２﹒２２銀。不過，今年以嚟加埋已經爆升咗超過一倍。　　幾隻半導體大佬都逆市造好，一哥ＡＳＭ太平洋（００５２２）相當勁，升咗近４巴仙，報１０６﹒４銀。中芯（００９８１）上個月尾話配股抽水近２６億銀，佢嘅兩個主要股東大唐電信科技產業同國家集成電路基金話會行使優先認購權，額外認購總共５億美金嘅永久次級可換股證券，中芯今日都彈起逾兩巴仙，報１１﹒２８銀。　　平時無乜炒作嘅軍工佬，但今日唯獨中船防務（００３１７）（滬：６００６８４）炒咗上嚟，原來Ａ仔下個禮拜將會開資產重組說明會，唔少缸友都認為好事近即掃貨Ｈ仔全日炒高逾１０巴仙，報１２﹒２８銀，勁。假期愉快，請請！　　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性　　　　　　　本文只供參考之用，並不構成要約、招攬或邀請、誘使、任何不論種類或形式　　　　　　　之申述或訂立任何建議及推薦，讀者務請運用個人獨立思考能力自行作出投資　　　　　　　決定，如因相關建議招致損失，概與《經濟通》、編者及作者無涉。

全新節目《說說心理話》青少年不可以戀愛！？真實個案講述驚心動魄經歷► 即睇