職場

　　呢兩周內，可以睇到你一年氣色，所以要「養」，點「養」呢？

一．宜早睡，保身體健康

　　最好晚上十一點前瞓，以便肝膽排毒，否則會面黃黃，兼令肝火上升。肝膽嘅功能唔好，會影響消化脂肪，嚟緊歲晚新春，滿枱都係豐腴肥美嘅食物，點算呢？你當然會抗議，話十一點都未番到屋企，唔通係街瞓咩？我明，盡量啦！至於是否早起，就適隨尊便，可以早醒看雲起、聽鳥鳴；亦可以好似我咁，賴床聽音樂。

二．慳D駛，保財政健康

　　年輕嘅收到花紅或逗咗利是，都想豪花一下，成熟嘅可能諗一年做到晚，要獎勵自己，趁歳末大減價任性一下。不過駛大咗會令鼻頭出現赤紅之色，即破財之兆、或者，應該講，係破財鐵證。我唔係唔畀你買，祇係提議最好過咗雨水先買啫。

三．慎言行，保人際關係健康

　　呢段時間，小心言語行為、身體語言。唔好整蠱做怪、吹水大晒，以免撩起人把火、招來畀人問候惡果。又要保持風度，唔好鬧人，無謂畀人背後媽叉，孭住負能量。

四．要開心，保情緒健康

　　有D單身人士喺佳節會觸景傷情，慨嘆自己形單隻影。D有家室嘅，又可能為去邊度拜年先、買乜禮物、同邊個食飯而有意見，黑面過年。兩者都係搵自己笨，新春一定要笑口常開，否則活該。

　　我明白以上嘅健康生活準則，實在係強人所難。我盡人事寫，你盡人事做啦。

　　以下就簡單好多，今年年卅晚十一點，我估你都未瞓。屆時貴神在東南，福門在西北，你若蒲緊，可向呢兩個方向漫步15分鐘。如果暖笠笠喺屋企，就喺呢D方位活動吓，可以參拜、鞠躬、做運動、跳hip hop，動吓氣場，以便迎貴接福。

　　在此祝願各位新年新氣象，運程齊向上！

　　根據子平高人嘅推算，今年旺木火行業。

　　先談火，IT盛宴應該繼續排開，科網熱潮繼續澎湃，娛樂事業繼續大紅大紫。扮靚行業亦前景秀美，包括美髮、美容、化妝、穿戴飾物……等。較冷門嘅藝術家、心理學家、演說家亦有爆紅機會。

　　至於飲食業，有將之分類為屬火、亦有認為屬水。飲食業有D正在辛苦經營，希望有轉機啦。Hospitality行業，如酒店、主題公園都唔錯。

　　諸凡發光發熱嘅事業，例如電力、能源、光學、照明等都加入可能走紅嘅火團。

　　木嘅行業則係另一種發熱發光，與文化、哺育、caring有關，包括文學、文藝、寫作、教育、出版，今年真係make a difference咧。喺培育層面，有幼兒教育、安老護理、藥物醫療。宗教亦大行其道，由心靈雞湯，至天人感應，都有市場。

　　如果跟住呢條線索順藤摸瓜，揀股方面，科技、電訊、晶片光學、演藝、娛樂、教育、環保、能源等品種是否可以睇高一線呢？又如果木火並旺，專攻網上閱讀嘅閱文係咪應該留意呢？（當然，考慮買入或持有時，必須留意呢D股份嘅基本因素，政策風向，最重要係揀位入，唔係我廢嗡低買高沽，而係今年股市隨時有大震盪，超級藍血月後即有小股災，你地喺合理嘅市盈率入貨，坐艇時唔會嘔得咁犀利。）

　　參考子平高人以木火為用神之說，經濟方面，上半年好，下半年入秋要小心。另農曆三、六、十二月有震盪，因為係土嘅月份。因土生金而攪亂了局。股市會有極度波動，希望係虛驚，緊盯農曆七月（庚申）、八月（辛酉）。

　　好意先生去年已批戊戌年危機四伏：

　　「戊戌兩字皆無底劃，有內陷倒塌之兆，今年可能因轟炸而做成地陷，亦會有天災大地震，傷亡慘重，實在令人擔心！」

　　喺職場層面，亦非安寧，佢覺得戊戌有兵器對峙之意，喻上司與下屬、政府與市民、國與國、企業與企業，都有紥馬之勢。各方易自以為是、挑釁攪事。所以今年大家不宜周圍點火，恐招燒親惡果！

　　在此祝百業興旺、贏到開巷！