世事政情

　　麥明詩（Louisa）與機師盛勁為上月舉行3場「勁甜麥」盛大婚禮，包括圍村盆菜宴、遊艇會婚宴及戶外結婚派對。籌備一場婚禮已經好辛苦，分三場舉行更是超高難度，麥明詩坦言舉行馬拉松式婚禮，原因只想人人開心，尤其「四大長老」的心情特別重要，寄語大家不要輕信家人「冇所謂」之言。

　　麥明詩順利完成三場不同主題、形式的完美婚禮，已成為香港準新人的典範。麥明詩9日分享心得：「唔少朋友都問我，哇搞三場婚禮，咪好辛苦！的確係，完事後直情要瞓足成個禮拜先recover（復原）到。其實唔係因為想搞到好『盛』大，而係源自於一個儘量make everyone happy嘅初心。」

　　不少人籌備婚禮期間，與愛侶、家人發生不少衝突，明明開心事卻令大家有磨擦。麥明詩說：「由於我和盛生好怕衝突、唔開心，所以我哋好早就決定將婚禮分幾次搞，而每一場都有各自嘅主角。大大小小嘅選擇就因住主角嘅需求而決定。」她表示第一場圍村盆菜宴的主角並非自己，而是老爺、奶奶：「我地盡跟圍村傳統，賓客絕大部份都係佢哋嘅親戚和朋友，而表演嘉賓方面，就邀請了奶奶很喜愛嘅李龍基先生。」

　　麥明詩也沒有忽略自己父母：「第二場係（遊艇會）正常擺酒，主角就係麥生麥太，菜式、流程、程序等都以佢地嘅意見為首。圍數全部歸佢地兩老，只受場地所限而唔使同對家協調。」先滿足四大長老，然後再到一對新人自己的意願，第三場婚宴就是麥明詩和老公最期待的戶外瘋狂派對：「主角終於係我同盛生喇，因為之前已經take care咗雙方父母嘅要求，呢次我哋就可以盡情選擇自己鍾意嘅嘢 - 戶外草地、樂隊歌曲、西式食物、無限酒精… 爸爸媽媽雖然唔識欣賞，但係都好盡力去嘗試投入。」

　　原來麥明詩不單止讀書拎10A，連做女兒、新抱都攞10A：「呢個（三場婚宴）安排，幫我哋避免咗唔少衝突。男女家唔使爭圍數、長輩和後輩唔使爭論食物和形式中式定西式；頭兩場我和盛生安分守己地做好兒子和女兒的本分，再於尾場玩得好盡興（盡興到啲相都唔出得街）。咁壞處就係… 真係好攰。」

　　她搞笑地提醒網民，一定不要相信家人「冇所謂」之言：「每人屋企都唔一樣，家家有本難念的經，以上純粹share下我倆嘅經驗。總括來講，我爸爸媽媽、老爺奶奶也是非常隨和，我們非常幸運，而最後似乎各人都開心。不過同時都提醒一句，家人話『冇咩所謂，簡簡單單就OK』呢句說話…ummm…千祈唔好盡信呀！唔知你哋又有冇啲咩婚禮後嘅insight呢？喺comment share吓吖！」

　　張天賦（MC）和柳應廷（Jer）即將聯手開音樂會，作為香港樂壇兩位實力唱將，二人都十分期待到時同台演出，二人參加《全民造星》比賽時候認識，大家都各自在樂壇打拼到今天，到時出盡混身解數希望合作時擦出火花。

　　二人接受訪問時已經表現興奮，柳應廷表示：「當我知道有呢個合作之後係好興奮，係咁同公司講，我哋一定要接呢個Job。我自己好期待，因為由造星開始認識MC，佢一直都係一個好唱得嘅唱將，而我亦都係以唱將形象出現，所以都已經幻想到一齊會好有火花。」張天賦勾起當日比賽不少回憶，他說：「當初知道要演出《KATCH OUR LIFE音樂會》嘅時候，係未知會同邊位歌手合唱，嗰陣時就諗邊個會係我最期待呢？頭兩甲一定係Jer，因為同佢嘅歌路都有相似嘅地方，佢亦都係一位好出色嘅歌手，同台經驗唔算太多，今次有一個真正嘅Concert可以同佢合作，同佢一樣超級興奮。」

　　二人背景都十分相似，他們同樣是《造星》出身、入行前經常Busking、懂得玩結他、唱歌音域與曲風也差不多，有著這麼多的「相似」，柳應廷幻想：「應該喺聲音上面嘅交流，大家好似擂台上面較量嘅感覺，好似兩個Fighter，鍛鍊咗一身武功，到時去到擂台大家會All In攞出嚟。」

　　張天賦腦海裡面亦呈現了很多不同畫面，他繪形繪聲道：「可能會係各持一方，好似音樂會海報咁一黑一白，然後大家去做一個拉扯或者對抗，甚至喺台上面一齊玩樂器，或者我哋會攞我哋畢生所學嘅嘢出嚟，或者攞啲我哋唔識嘅嘢出嚟玩，我覺得都係幾有趣嘅一個地方。」

　　張天賦同樣希望在唱功上，可以給台下觀眾驚喜，他說：「今次揀歌方面偏向平時未必可以喺舞台上面，或者未必有機會玩嘅歌，再喺入面揀一啲再刺激啲再Extreme（極瑞）啲嘅作品出嚟，因為好多時候揀歌都要迎合某啲原因，但今次同Jer合作可以大膽啲玩多啲嘢，同埋我哋加埋嘅上限係會高好多。」柳應廷亦希望做出一個截然不同的音樂會，他表示：「近排大家都愛上推出搖滾、Powerful啲嘅歌，宣傳Poster裡面大家亦都攞住結他Rock Rock地，都幾期待我哋到時喺台上面變成一個Band Show，然後一齊揈頭，台下有人轉圈（Mosh Pit），講下笑，未必會，但會係一個好投入但又幾有力量嘅表演。」

　　二人傾力演出，他們期待台上台下打成一片的畫面，張天賦提醒入場觀眾該要帶住非常期待的心情：「要同我一樣咁期待，因為目前好多嘢都係未知之數，但如我所講，我同Jer會擦出一個好強勁嘅火花，而且呢個係冇下限亦都冇上限嘅火花，好似睇煙花咁，你唔知會射得幾高、幾勁。」