世事政情

　　全國人大常委會第二十七次會議噚日(30日)喺北京人民大會堂閉幕，會議全票通過新修訂《基本法》附件一「香港特別行政區行政長官的產生辦法」同埋附件二「香港特別行政區立法會的產生辦法和表決程序」。立法會嘅選舉方式同之前傳聞嘅都差唔多，今次暫時按下不表，等之後再慢慢分析，今次想集中主力講下，選舉委員會喺日後選舉嘅奧妙之處。

　　成個選舉方法未公布之前，好多人都會覺得，資格審查委員會會係一個掌管候選人生死嘅機構，有無上權力。無錯，佢地係香港日後各級選舉候選人嘅「發牌機構」，但諗清楚，佢地只不過係判斷你係唔係愛國者，所以基本上只係篩選走一班「黃皮心更黃」嘅候選人，至於「心紅者」，資格審查委員會基本上見到身份證就會批。

　　成個選舉制度，掌控生殺大權嘅其實就係選舉委員會，因為立法會各個組別嘅候選人，需要向選舉委員會五個界別嘅每個界別之中，拎到最少2個、最多4個嘅選委提名，即係全數10至20個提名。內容公布之後，譚Sir譚耀宗都話，10個提名好低門檻，相信愛國嘅反對派都可以拎夠入閘；但Tina問過幾位建制派議員，佢地異口同聲都話，成個架構似乎係形成咗一個「畀面派對」，有知名度嘅政治人物，人脈網絡足夠，當然容易拎到提名，甚至係大政黨，單單係黨員選委嘅提名票都已經夠有凸。

　　但係單打獨鬥嘅候選人，要去求一張提名票，就絕對唔係易事。大家諗一諗，立法會三個組別，直選、功能組別同埋選委會組別，每個選委每個組別只係可以提名一個人，如果你係一個選委，你重唔重視自己嗰張提名票？想唔想將張票畀一個好大機會贏嘅候選人？所以觀乎依家嘅新制度，選舉只會側晒去有知名度、有勢力、有人脈嘅候選人，以上「三無」嘅，就真係要行多幾步敲門去求票。

　　最後亦有建制派同Tina講，咁大改動，第一次選有混亂就在所難免，但相信咁樣改動之下，西環肯定會肩負「操盤手」角色，協調各界人士出選，所以提名票搵「一張」就夠。

　　如果問依家有咩嘢可以令到全香港市民槍口一致嘅，的士業可以話係唯一。自從有的士行家自行放蛇捉Uber司機之後，全香港市民(除咗的士從業員)都齊心聲討的士行業，將過往坐的士受過嘅冤屈氣都發晒出嚟。雖然的士業將會有重組，推出的士車隊，而的士業最近亦都搞禮貌活動，但都無阻政府全面檢討網約車規管嘅決心，似乎政府已經心裡有數，香港即將落實Uber合法化。

　　Tina最近同一位執法部門高層飯局，佢就直言，Uber今時今日喺夾縫之中生存，擺到明就係得到政府嘅首肯；Uber嘅業務肯定唔會係合法，以政府今時今日嘅行政主導，再加上警隊嘅雷厲風行，有心要打擊Uber的話，肯定佢地明日就連上線都上唔到。「點解政府唔郁手？最重要就係Uber解決到的士行業永遠都解決唔到嘅問題：唔會揀客、唔會拒載、唔會濫收車資，所有行程都有後台去監察，有咩問題都投訴有門。更重要嘅係， 政府依家係要『無處不旅遊』，全世界大部分嘅旅客都會有Uber App去叫車，Uber就正正係幫到政府解決呢個大難題，試問的士業又點會有條件去同政府講數？」

的士業最近推行禮貌活動，但無阻政府全面檢討網約車規管（資料圖片）

　　有立法會議員就坦言，Uber所代表嘅網約車行業喺全世界都已經證明咗畀的士更有效率，而內地更加係其中之一，「網約車喺內地成行成市，亦都見到網約車同的士係可以拼行，你好難同阿爺講點解香港就只可以有的士而無網約車」。不過呢位立法會議員亦都坦言，特區政府亦都有責任平衡各方利益，全面開放市場令到的士牌價大幅下跌亦都唔係政府願意見到，所以佢都私下建議，下一步開放網約車的話，亦都要將網約車同的士嘅功能劃分，「的士可能係繼續打大眾化市場，而網約車就可以定更高嘅價格，係畀啲捨得花更多錢買服務嘅人士，咁就各有各嘅市場，河水不犯井水。」

　　議員亦都向的士業界派定心丸，認為如果網約車合法化，網約車司機亦都要喺規管之下營業，咁就自然要交牌照費、更高嘅保險費等等，「佢地嘅經營成本亦都會大增，唔會好似依家咁，有車牌、有架車就可以做，所以估計只會有部分網約車司機會正式登記，某程度上亦都會令到客源流返去傳統的士業嗰邊，同依家比，應該係有利無害。」