加入最愛專欄  收藏文章 

2021-04-26

港區人大政協當然選委都好頭痕!

  立法會仲審緊完善選舉制度嘅法例,有留意嘅讀者都見到,負責審嘅十幾位議員,對於法例都有唔少幾尖銳嘅問題,而政府某啲位都係有啲口啞啞,顯然見到一條咁重要、咁繁複嘅法例,喺咁短時間之內急就章要按人大嘅決定去訂立,肯定會亂到七彩,大家亦可以預期,嚟緊嘅選舉,亦一定會亂到七彩。

 

  Tina聽聞,自從新選舉方式公布之後,各界別對於新玩法,特別係選舉委員會選舉,都係一大堆問號浮晒喺塊面。選委會選舉令建制派最大困擾嘅係加多咗一個第五界別,即係港區全國人大代表、港區全國政協委員同有關全國性團體香港成員嘅代表界,人大政協就佔190席位。

 

(資料圖片)

 

  讀者都知道,做得人大政協嘅,好多都有幾重身份,變相佢地喺唔同界別都可以出選。但根據最新玩法,如果你係人大政協身份,又另外有其他身份有當然議席,咁就一定唔可以喺人大政協嗰面出任;最吊詭嘅係,如果人大政協,有另外嘅身份,而呢個身份唔係當然而要去選的話,咁人大政協就可以變咗做「食鬼」,將一啲可以選嘅議席食咗,直接坐上去唔使選,即係話個界別可以選嘅席位就會少咗。

 

  人大政協本身就已經係「愛國者」嘅認證,呢個新制度聽落畀到人大政協一個「特權」,落實「愛國者治港」,亦都係合情合理;但係令到某啲界別嘅位少咗,據聞就有好大意見。有界別私底下已經討論,希望有人大政協身份嘅界別人士最好就返去人大政協界別攞位,令佢地多返啲人出選,而建制派相信,呢個想法喺唔同界別都係有出現,人大政協身份就突然變咗不受歡迎人士。

 

  據聞人大政協自己本身都搞到好混亂,大家都唔知喺邊個位出好,而現屆立法會幾個人大政協,更加擔心自己嚟緊立法會唔選又或者選唔到的話,個選委席位都無埋(因為人大政協又係立法會議員的話,一定要用立法會嘅選委議席出),出年連特首都唔可以選。因為安排的確係對部分人或者界別出現不公情況,Tina聽聞將會由全國政協常委唐英年領導嘅友好協進會全面協調,希望將個餅分到大家都高興。之但係餅就係咁大,咁多人要分,唔通真係要有耶穌分餅嘅本領先得?

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

全新消閒節目《周一加油站》,幫你踢走悶氣,重新注入元氣! ► 即睇

更多立會透視鏡文章
你可能感興趣
#立法會 #人大政協 #選舉委員會 #選舉改革
編輯推介
即時報價
全文搜索
Search
最近搜看
大國博弈
台疫情反彈
More
Share