吃喝玩樂

　　又到榴槤飄香的季節，連北歐家具品牌IKEA都推出榴槤雪糕，反應更極之熱烈，證明榴槤迷已經準備好狂食榴槤，怕錯過這一年一度好時機。一杯雪糕、一件蛋糕，只夠止渴。要盡情地投入榴槤飄香當中，不要錯過任何榴槤放題。酒店每年推出的榴槤宴、榴槤自助餐，愈來愈豐富，今年更有新品種登場；還有全新主打任食榴槤的品牌舉行放題活動。而且，不知從何時起，榴槤好像跟「有獎遊戲」掛勾。有得食有得玩，總之，今年也不要錯過！榴槤迷，are you ready？

 

榴槤放題／自助餐／下午茶 2023 | 1. 榴槤自助早午餐、下午茶、首加推自助晚餐！兩款獨家榴槤新品種登場—唯港薈

 

　　香港的榴槤迷，無一不識唯港薈馬來西亞榴槤節。榴槤節今年已踏入第五屆，大受歡迎的「飄香榴槤下午茶」已經開始，而將於8月6日開始在酒店一樓Silverbox宴會廳舉行的活動，除了6場榴槤節自助早午餐外，今年更首次新增6場榴槤節自助晚餐。到時，酒店行政總廚兼有「榴槤王子」之稱的何偉誠師傅（Danny），繼續與客人交流榴槤品嘗心得外，更會主持有獎遊戲，大獎包括唯港薈餐飲禮券和原個新鮮榴槤等。

 

今年榴槤節可品嘗5款榴槤果肉拼盤。

(圖片來源：唯港薈提供)

D101榴槤鮑粒焗釀海螺。

(圖片來源：唯港薈提供)

 

　　今年榴槤節可品嘗5款榴槤果肉拼盤，當中包括頂級D197貓山王、口感綿密的D163葫蘆、甜度高的D168王中王，而亮點是兩款分別由Danny及藝人阿燦首次由馬來西亞柔佛州引來香港的榴槤品種——清香型的「王子」及濃香型的「皇室」。除了榴槤果肉拼盤外，還有一人一份的貓山花雪蓮子烏雞燉鱈魚花膠湯，及D101榴槤鮑粒焗釀海螺。

 

　　而自助餐桌上還有馬來西亞五大名魚之一的巴丁魚，以發酵榴槤和香辣醬汁調味，惹味十足。任食的還有榴槤桂花水晶雞卷、榴槤金錢袋、榴槤咖啡骨、檳城蝦麵等，甜品有榴槤麻糬葡撻、榴槤布甸和榴槤斑蘭卷等。記得預早訂位外，更要練習加大胃納。

 

除了6場榴槤節自助早午餐外，今年更首次新增6場榴槤節自助晚餐。

(圖片來源：唯港薈提供)

「榴槤王子」之稱的何偉誠師傅(Danny)，繼續與客人交流榴槤品嘗心得。

(圖片來源：唯港薈提供)

 

　　至於「飄香榴槤下午茶」，Danny加入椰子風味，設計出多款新口味鹹甜點。款式豐富的鹹甜點包括椰子榴槤燉湯、馬來西亞白咖啡榴槤泡芙、椰香貓山皇奶酪卷和椰香斑蘭榴槤蛋撻等。每位客人更可享用三件榴槤果肉拼盤，包括獨家新品種D-Putera王子、葫蘆及紅肉之外，更可任食自家製榴槤軟雪糕及椰子榴槤珍多冰，榴槤迷必定大滿足！

 

Danny在今年的「飄香榴槤下午茶」加入椰子風味。

(圖片來源：唯港薈提供)

榴槤迷必定大滿足！

(圖片來源：唯港薈提供)

 

飄香榴槤下午茶

地址：尖沙咀科學館道17號唯港薈2樓The Market

電話：3400 1308

價錢：每位$468、兩位$788

日期：2023年7月10日起至另行通知

時間：3pm-5pm

 

唯港薈馬來西亞榴槤節

地址：尖沙咀科學館道17號唯港薈1樓Silverbox宴會廳

價錢：成人$888、兒童（3-11歲）$558

日期：自助早午餐及晚餐 2023年8月6日、12日、27日、9月10日；自助早午餐 8月13日、9月17日；自助晚餐 9月3日、24日

時間：自助早午餐 11:45am-3pm、自助晚餐 6:45pm-10pm

網上預訂請按

 

下一頁：過足癮！2小時任食8款馬來西亞樹上熟榴槤 + 一人份榴槤甜品下午茶！做埋榴槤達人贏機票

 

榴槤放題／自助餐／下午茶 2023 | 2. 過足癮！2小時任食8款馬來西亞樹上熟榴槤 + 一人份榴槤甜品下午茶！做埋榴槤達人贏機票—Dr. Durian

 

　　聽名字便知Dr. Durian主打榴槤，趁當造期，品牌將於7月21日至8月21日的一個月時間內，在佐敦京士柏衛理道的會所中推出2小時馬來西亞榴槤放題。Dr. Durian提供的榴槤都是天然樹上熟，不會人工採摘。任食的榴槤每日有6至8款之多，包括D197老樹貓山王、D24山頂XO、D13金包、D18多陽紅、D2夢中情人、D201江海、D175紅蝦、D160竹腳、D101紅肉及D200黑刺，由清香型至濃郁型都有。除榴槤外，每位還有一份Dr. Durian自家以新鮮榴槤製作的下午茶，鹹甜點包括榴槤泡芙、榴槤肉蛋糕、榴槤糯米飯、榴槤千層糕、榴槤芝士Pizza、馬拉串燒配榴槤醬及榴槤糯米糍。

 

任食的榴槤每日有6至8款之多。

（圖片來源：Dr. Durian提供）

除榴槤外，每位還有一份Dr. Durian自家以新鮮榴槤製作的下午茶。

（圖片來源：Dr. Durian提供）

 

　　任食榴槤夠興奮外，凡惠顧的客人更可參加有獎遊戲，主要以問答形式進行。每場的得獎者可獲得榴槤外，更設有整個Dr. Durian活動期間的三名終極大獎。第一、二、三獎分別為AirAsia雙人來回香港及檳城、沙巴和吉隆坡機票。食完馬來西亞榴槤，再飛去歎美食。這些機會想擁有，任食榴槤前，最好認識多些榴槤品種知識。

 

Dr. Durian提供的榴槤都是天然樹上熟。

（圖片來源：Dr. Durian提供）

Dr. Durian是主打榴槤的品牌。

（圖片來源：Dr. Durian提供）

凡惠顧的客人更可參加有獎遊戲。

（圖片來源：Dr. Durian提供）

 

Dr.Durian任食2小時馬來西亞榴槤

日期：2023年7月21日至8月21日

時間：（每日3場）12:30pm-2:30pm；4:30pm-6:30pm；7:30pm-9:30pm

地址：佐敦京士柏衛理道10號2樓

收費：（星期一至四）12:30pm-2:30pm及4:30pm-6:30pm $598／位、7:30pm-9:30pm $688／位；（星期至至日及公眾假期）$688／位

網上預訂：https://inline.app/booking/drdurian/july2023

 

下一頁：歎到10月！ 周末下午茶食D101榴槤西多士、巴斯克芝士蛋糕！指定時段自助晚餐即開榴槤山送榴槤拼盤

 

榴槤放題／自助餐／下午茶 2023 | 3. 歎到10月！ 周末榴槤下午茶食D101榴槤西多士、巴斯克芝士蛋糕！指定時段自助晚餐即開榴槤山送榴槤拼盤—大灣咖啡廳

 

　　大部分榴槤主題下午茶及自助餐都只提供至8月底，想encore再encore，可以去大灣咖啡廳。香港嘉里酒店的大灣咖啡廳，由現時至10月2日推出「榴槤盛薈」周末下午茶自助餐及「東南亞及榴槤美食巡禮」自助晚餐。下午茶自助餐每逢周末供應，鹹點由酒店行政總廚Michael Clinton率領的廚師團隊設計，包括充滿香港風味的D101榴槤西多士、炸D24 榴槤波、特色榴槤披薩、榴槤越式米紙卷和雜錦榴槤壽司卷等。甜點方面，由酒店行政糕餅主廚Jérôme Husson構思，包括榴槤歌劇蛋糕、榴槤提拉米蘇、榴槤巴斯克芝士蛋糕等。

 

「榴槤盛薈」周末下午茶自助餐及「東南亞及榴槤美食巡禮」自助晚餐提供至10月。

（圖片來源：香港嘉里酒店提供）

雜錦榴槤壽司卷十分創新。

（圖片來源：香港嘉里酒店提供）

 

　　另外，每位成人客人更可免費獲贈精選榴槤乙件。精選榴槤款式因應貨源情況而每日不同，精選品種包括口味濃郁、帶回甘果香的D197 貓山皇、甜而不膩的D24蘇丹王、味道清甜的D101 紅肉 及果肉嫩滑的D888甘榜。下午茶每位只須$388，抵食！

 

每位成人客人可免費獲贈精選榴槤乙件。

（圖片來源：香港嘉里酒店提供）

 

　　除下午茶外，大灣咖啡廳同期更晚晚推出「東南亞及榴槤美食巡禮」自助晚餐。自助晚餐除了提供凍海鮮、日式刺身與豐膄烤肉，還有東南亞美食如馬來西亞煎蠔餅與麥皮龍蝦鉗、惹味香濃的新加坡胡椒蟹與肉骨茶、泰式炒金邊粉、越式生牛肉河粉、菲律賓炭火烤豬腩等。而最大亮點當然是一系列以榴槤入饡的菜式，好像港式榴槤脆奶、特色榴槤披薩、炸D24 榴槤波、法式榴槤焦糖燉蛋和榴槤撻等。

 

大灣咖啡廳同期更晚晚推出「東南亞及榴槤美食巡禮」自助晚餐。

（圖片來源：香港嘉里酒店提供）

港式榴槤脆奶。

（圖片來源：香港嘉里酒店提供）

法式榴槤焦糖燉蛋。

（圖片來源：香港嘉里酒店提供）

 

　　另外，客人可到訪酒店三樓特設的榴槤控打卡熱點拍下美照，更不容錯過餐廳逢星期五至日及公眾假期自助晚餐時段特設的榴槤專區，包括吸睛度十足的榴槤山，另有廚師於指定時段即席開切榴槤。每位成人客人凡享用星期五至日及公眾假期之自助晚餐，可獲榴槤嘗味拼盤乙份，細味四款是日精選不同品種的榴槤。還有，每張預訂餐桌可獲「競猜榴槤遊戲大賞」遊戲券乙張，參加者只可根據外觀及氣味判斷榴槤品種。經抽籤最快選出而又猜對所有答案之參加者可免費獲贈精選榴槤乙份。

 

大灣咖啡廳

地址：紅磡紅鸞道38號香港嘉里酒店3樓

電話：2252 5246

 

「榴槤盛薈」週末下午茶自助餐

價錢：每位$388

日期：2023年7月8日至10月2日（逢星期六、日及公眾假期）

時間：3:15pm-5pm

 

「東南亞及榴槤美食巡禮」自助晚餐

價錢：星期一至四 每位$708；星期五至日及公眾假期 每位$808

日期：2023年7月8日至10月2日

時間：6pm-9:30pm

 

下一頁：真心抵！低至$236食榴槤下午茶Buffet！泰國新鮮金枕頭炮製千層酥、芝士撻！同場食埋多款泰國名菜

 

榴槤放題／自助餐／下午茶 2023 | 4.真心抵！低至$236食榴槤下午茶Buffet！泰國新鮮金枕頭炮製千層酥、芝士撻！同場食埋多款泰國名菜—尚廚

 

　　榴槤品種多，就像紅酒一樣，各人有不同喜好，泰國的金枕頭有不少香港人的回憶味道，也有不少捧場客。想狂食金枕頭的話，機會來了。九龍東皇冠假日酒店The Chef’s Table尚廚由7月1日起，逢星期六、日及公眾假期推出全新「泰愛榴槤」周末下午茶自助餐，每位$248，網上商店預付可享85折優惠，折後約每位$236，十分抵食。

 

「泰愛榴槤」周末下午茶自助餐

（圖片來源：九龍東皇冠假日酒店提供）

 

　　任食下午茶的重點當然是榴槤，尚廚以新鮮金枕頭榴槤果肉炮製的甜點，分量十足，味道香甜，口感軟滑，包括榴槤椰果千層酥、榴槤芒果糯米飯、榴槤泡芙、榴槤班戟、榴槤芝士撻等。清香的斑蘭甜品包括斑蘭椰子慕絲蛋糕、斑蘭芒果西米糕、迷你斑蘭葡式蛋撻、斑蘭戚風蛋糕；東南亞風的茘枝大樹菠蘿撻、香茅白朱古力蛋糕、香茅啫喱、椰子奶凍、椰汁珍多冰；仲有即製朱古力心太軟。

 

尚廚以新鮮金枕頭榴槤果肉炮製的甜點，分量十足。

（圖片來源：九龍東皇冠假日酒店提供）

大量榴槤甜品。

（圖片來源：九龍東皇冠假日酒店提供）

 

　　另外，以泰國為主題，任食美食還有一系列泰菜，如泰式柚子沙律、泰式紅咖喱雞肉迷你熱狗包、泰式斑蘭雞、泰式豬頸肉和泰式紅咖喱大蝦炒飯。再加上即煮粉麵檔、壽司冷麵、水耕菜沙律吧、煙三文魚、包點、餐湯、中式點心和7款口味的Häagen-Dazs雪糕，更包無限添飲咖啡及紅茶，豐富度不輸晚市自助餐。

 

以泰國為主題，任食美食還有一系列泰菜。

（圖片來源：九龍東皇冠假日酒店提供）

泰式香辣沙律。

（圖片來源：九龍東皇冠假日酒店提供）

 

「泰愛榴槤」周末下午茶自助餐

地址：將軍澳唐德街3號香港九龍東皇冠假日酒店1樓

價錢：成人$235.6（原價$248+10%）、小童$178.6（原價$188+10%）（網上預訂85折優惠，已包括以原價計算之加一服務費）

日期：2023年7月1日至9月30日（逢星期六、日及公眾假期）

時間：3pm-5:15p

網上預訂請按

 

問：馬來西亞榴槤幾時當造？

答：馬來西亞榴槤一年有2次當造期，分別是每年6月至8月或11月至1月。

 

問：馬來西亞榴槤有甚麼必食品種？今年在香港可以食到新品種嗎？

答：通常必食的有貓山王、葫蘆、黑刺、紅蝦、蘇丹王、紅肉等。而唯港薈首次在馬來西亞柔佛州引入榴槤品種——清香型的「王子」及濃香型的「皇室」，大家把握機會試一試。

　　世界莫名其妙，天氣變幻莫測，既然大閘蟹都遲來了，榴槤又怎會早到呢？所以踏入12月臨近聖誕，我們不一定要吃火腿，也可以吃靚靚榴槤大餐……

 

　　近日尖沙咀海景嘉福洲際酒店（InterContinental Grand Stanford Hong Kong ）的海景咖啡廊，就跟榴槤供應商榴槤千金，合作推出以榴槤為主題的「馬來西亞榴槤飄香」自助餐。該供應商擁有馬來西亞彭亨州自家果園，提供的都是國賓AAA級榴槤，所以品質調控比較佳，酒店自助餐也因此樂於做聯乘。

 

　　海景咖啡廊的自助午餐是有點瘋狂，客人可在90分鐘內無限任食多款國賓AAA級榴槤，基本上是榴槤當飯食囉，不過因為是自助午餐，所以並不是人人可以參加，至少上班族就未能享用，機會只能留給比較清閒的無業/退休/請假人士。至於自助晚餐，情況是有點不同，每位食客可配給一份共三至四款（視乎當日供應）AAA級榴槤 —— 各位讀者是否嫌分量太少呢？原來尚有供應很多款以榴槤入饌的冷盤、熱菜和甜品，所以都是無限任食，只不過以不同形式提供啫。

 

踏入十二月，聖誕樹都出了，我們卻不吃火雞，而在吃榴槤。

今次的美食推廣，雖然很短期，但都做了不少佈置。

 

　　可能令各位榴槤迷最掃興的，是這個「馬來西亞榴槤飄香」自助餐的供應期真的太短，只限由11月28日至12月9日，即是本文出街只剩三日囉！你叫像我這樣的寫食人士情何以堪呢？不過站在酒店營運立場，美食推廣有時不太適合拉得太長，長得滯就做到殘做到爛，令人開始感到生厭，然後冇得返轉頭再做，所以呢，有時寧願要在好短時期有好Intense反應，跟著見好即收，讓各界意猶未盡，就可以明年捲土重來再掀高潮。

 

　　差點忘記了要提一提，透過官方網上商店預訂自助晚餐可享高達75折優惠，如果各位讀者有興趣，不妨上網碰碰運氣。

 

餐廳室內牆壁都粉飾過，貼上帶有東南亞風情的畫作。

酒店員工處理多款榴槤，真是做到手都軟，若果本身不嗜或討厭榴槤，就簡直是「厭惡性工作」。

 

　　我享用的是自助晚餐，每位食客可獲一份榴槤，當晚就一份共有四款，分別是貓山王、高山XO、蘇丹王、謎之槤，大家吃過之後，均異口同聲認為 —— 其實都意料中事 —— 以貓山王的味道最好最香最濃，當然，每個人的口味和喜好不同，各款榴槤都有其粉絲，得出的結論也有可能不一樣，但可以好肯定的，是貓山王必須要放到最後才享用，否則其他味道較輕的榴槤品種的味道會被遮蓋。

 

我用餐當晚，每位食客均可獲得一份四款榴槤，分別是貓山王、高山XO、蘇丹王、謎之槤。

 

下一頁：更多榴槤自助晚餐美食

 

　　都說自助晚餐有多款榴槤入饌的菜式，包括泰式榴槤雞肉咖喱、泰式香葉肉碎榴槤薯蓉批、榴槤四重芝士薄餅、榴槤壽司、中式榴槤燉雞湯、香脆炸榴槤等，莫以為這些菜式是象徵式加少少榴槤成份或者榴槤副產品，其實全部都落得好重手榴槤肉，以中式榴槤燉雞湯和泰式榴槤雞肉咖喱為例，真是用了大大件榴槤肉，可見今次自助餐成本不輕，如果沒有供應商合作的話。

 

所以東西都可以「壽司化」，所以我們有榴槤壽司。

海景咖啡廊的中式燉湯一同都不錯，比很多其他酒店自助餐都好。

這次推出的中式榴槤燉雞湯，真的好大件榴槤，湯水亦夠香甜，雞味與榴槤味並存。

泰式榴槤雞肉咖喱，雞肉和榴槤肉都是大大件，好重手。

榴槤四重芝士薄餅，可列入「激死意大利人系列」的薄餅食品，味道又真的不錯。

 

　　據說意大利人對意大利Pizza非常認真，加入菠蘿都已經喊打喊殺，那麼落上榴槤會否氣得噴血？這裏就有榴槤四重芝士薄餅，表面上好似好奇怪，但平心而論，味道不單幾OK，而且入口感覺「很正常」，好像雅枝竹或其他軟身蔬菜，吃下去質感與味道都沒有違和，終竟是不容易辨別究竟芝士重口味啲還是榴槤重口味啲。

 

泰式香葉肉碎榴槤薯蓉批，將泰國傳統菜式加入榴槤成份，味道OK喎。

當晚超人氣的香脆炸榴槤，每次炸好上枱，都被迅間搶掉。

香脆炸榴槤真的很不錯，前後香炸兩次，令炸漿很香脆，內裏的榴槤好溶又化，入口好正。

 

下一頁：更多榴槤自助晚餐美食—甜品

 

　　自助晚餐的榴槤甜品選擇，不算太多，包括有榴槤泡芙、榴槤朱古力撻、榴槤沙翁、榴槤班戟，當然亦明白，總不能把自助餐的甜品全盤榴槤化，這個做法無疑可贏得鋼鐵級榴槤迷歡心，卻同時會得罪所有非榴槤愛好者的感受，因此適可而止最OK啦，況且有事不是數量問題，而是質素才是重點。

 

榴槤班戟，可說是多啦A夢豆沙包的榴槤版，即叫即做當然好滋味，如果可以加入豆沙餡，或會更好味。

幾款榴槤甜品選擇，除了有文字說明，也有榴槤做襯托，唔識字都應該唔會夾錯啩。

榴槤泡芙，好食，本身個泡芙做得好，加入AAA級榴槤做餡係冇得輸。

海景咖啡廊一向有提供美味的班蘭沙翁，如今加入榴槤餡，就變成榴槤沙翁，也一樣美味。

榴槤朱古力撻，榴槤和朱古力並沒有違和感，其實朱古力是很百搭，跟很多食材都可以搭訕。

 

下一頁：更多榴槤自助晚餐美食—海鮮、各國美食、甜品

 

　　老老實實，海景咖啡廊的常規自助餐一向都不錯，不少菜式都值得品嘗，有些看似平凡／非主打／像是配角的食品，更是很有驚喜，這裏可跟大家分享一下。

 

　　說到這裏，同枱朋友都想起很多往事，一位朋友說：「我十歲父母就帶我來這裏吃自助餐。」另一位則說：「我四歲時父母就帶我來。」記得我也是上世紀80年代首次踏足這裏，不過當時並非叫做海景嘉福洲際酒店，而是海景假日酒店（Holiday Inn Harbour View），連中學謝師宴都在這裏舉辦……真是回憶槤槤 —— 唔係，係連連囉。

 

凍海鮮類，例牌都最多人喜歡，包括加拿大鱈場蟹腳、凍熟蝦、小龍蝦、凍熟蜆、凍熟螺等。

一向印度食品做得很有水準，印度裔廚師也很落力在場Sell，這款印度天多里烤雞是不能錯過，品質感坊間其他印度餐廳有得比。

另一值得推推的印度食品，是印度咖喱魚塊，咖喱汁做得很美味。

泰式烤雞肉及燒豬腩，都深受客人喜愛。

越式河粉，估不到是自助餐之中的佳作，可說是自助餐中的「隱藏美食」。

越式河粉的湯做得好，配料也很豐富，牛腩、牛筋、牛栢葉都落齊。

香港人很敏感，秋風一起，就要食臘味飯，這個都算交足功課。

香梨杏仁餅，應該是正規甜品選擇中的常駐項目，因為真的做得不錯。

草莓慕絲蛋糕，近期才出現，草莓味道香濃，又不是太過甜膩。

 

　　絕對不可不試，或者必須一試再試，是即叫即製的Tiramisu，那個Mascarpone Cream打得好靚又夠厚，不會瀉晒溶晒，而且酒香、咖啡香、芝士香都具備，味道與質感均遠遠拋離預早做定放在雪櫃太久的貨色，以至我有時很衝動地一連吃掉兩個，不過同枱的朋友都可以吃三個或以上。

 

酒店行政總廚親自示範即叫即製Tiramisu，並強調Mascarpone Cream要打得又靚又厚。

新鮮做好的Tiramisu，真是非常之美味，入口軟綿香滑無比，好想食多幾個。

自家製豆腐花，都不錯，豆味頗足夠。

我覺得被食客嚴重忽略的抹茶Financier，其實是做得有水準，味道夠，帶少少煙韌的質感亦佳，伴咖啡或濃茶必備。

 

「馬來西亞榴槤飄香」自助餐

地址：尖沙咀東部麼地道70號海景嘉福洲際酒店M層 海景咖啡廊

電話：2731 2860

網上訂座：https://zh-tw.icgrandstanford.com/products/cafe-on-m-durian-dinner-buffet