世事政情

　　【晴報專訊】林盛斌（Bob）育有三女一子，平日嘻皮笑臉的Bob，日前接受吳若希（Jinny）的YouTube頻道訪問時，談到女兒為了他在網上留言反駁黑粉，Bob竟忍不住留下男兒淚，坦言當網民認為自己是垃圾時，仔女仍會努力捍衛自己，令他大受感動。

Bob與吳若希真誠對談，分享為人父母的內心感受。（網上截圖）

　　林盛斌平日熱衷在社交網跟網民互動，即使有人留言取笑，甚至人身攻擊，他照樣會正面回應對方。不過Bob透露曾有haters到他女兒的社交平台留言攻擊，但女兒的反應令他大為感動：「個女同我講『有啲人留言，話你爸爸好樣衰，你會唔會想嘔』。」他指囡囡大方回應說︰「我唔知你有幾靚仔，喺我心目中，我爸爸係最靚仔。」

Bob提到女兒在網上為他辯護時，忍不住感觸爆喊。（網上截圖）

　　Bob大讚女兒非常生性，他亦教導女兒不用刪除留言或封鎖對方，不妨坦蕩蕩跟對方交流。他向Jinny透露二女曾回覆網民說「唔認同爸爸係垃圾，覺得爸爸係英雄」，令他在鏡頭前激動落淚：「當有人覺得你係垃圾嘅時候，但原來仔女覺得你係英雄…好多人唔明白我哋面對一啲壓力，有啲留言我唔在意，但原來仔女會守護我。」他擔心自己的幕前工作會影響子女：「我喺電視台扮鬼扮馬，會唔會令仔女覺得爸爸係廢柴、肉酸呢？但佢哋原來會以爸爸為榮！」

Bob嫂曾流產

Bob表示太太及四位子女，永遠是他最強大的後盾。

　　另外，提到Bob是圈中出名的多仔公，他直言當初從未打算追男丁：「生細仔（林道申）之前，太太曾經有一胎流產，我哋為胎兒辦超渡儀式時，我同自己講『如果將來胎兒再嚟，想做我孩子，我哋一家都好歡迎』，無諗到太太流產兩個月後就傳嚟（懷孕）好消息。」Bob非常感恩家中有四個孩子，同時他發現即使不獲全世界認同，家人永遠都是真正欣賞和支持自己的粉絲。

　　「金牌司儀」林盛斌（Bob）近年在YouTube開設Channel，以正能量訊息希望可以影響大眾，相當有心。不過他的照片和影片就經常被盜取成為「騙徒」的工具。繼早前不斷「被」成為金融講座嘉賓之後，近日再「被代言」金融機構拍廣告，激到Bob要撰長文澄清，又寸爆對方一個微細位就已經踢爆係疑似騙局，事件公開後，結果亦相當有趣。

　　Bob認為近日市道麻麻，所以近日很多「騙徒」出嚟搵食，他力斥突然「被代言」一事，更罕有公開點名相關的機構，「你哋喺完全冇經過我同我公司嘅同意下，唔知係邊度攞咗幾張我嘅相走去用，我就真係覺得過分咗少少，唔係太好嘅。當我個經理人聯絡你哋嘅時候，傾咗幾句然後你哋竟然玩cut線？好啦，既然你咁想我幫你哋做宣傳，我就盡我『被代言人』嘅責任，等多啲人知道同認識你哋公司啦。」

　　Bob踢爆這家公司其中一項可疑位，令網友一眼就分辨出到底是否騙徒，他續言：「你話你公司喺國際金融中心二期86樓咁型，但係email個尾竟然係用 yahoo.com，其實聰明少少嘅人都已經唔會上當㗎啦，同埋就算你哋偷，都用啲新少少嘅相啦大佬，你用嗰啲相，有啲真係好多年前㗎嘞，呃人都花少少心思，做少少功課啦唔該，四個字形容你哋，不知所謂。我重申：我冇幫過呢間公司拍廣告，亦唔係代言人。」

　　Bob接受《晴報》訪問，他回覆說：「其實我都唔知嗰邊而家係乜嘢環境，成件事係有網民喺網上面見到，然後私訊問我係咪幫呢間財務公司拍廣告，係咪代言人，因為佢想借錢，問我係咪信得過，我先知道有件咁嘅事。然後我話俾經理人知，佢馬上打電話去了解到底點解冇經過我哋同意，就擅自攞咗啲相作商業推廣用途，不過傾咗幾句唔夠，對方就cut線，咁我都幾肯定呢啲係呃人㗎啦！如果間公司真係喺國際金融中心二期86樓，個email就唔會用yahoo咁流啦，同埋有朋友話俾我知嗰度應該係金管局其中一層寫字樓嘅地址，所以應該所有資料都係假㗎嘞。」

　　Bob透露我出完個post之後，該「公司」的電話已經打不通，網址又load唔到，他說：「而家件事交咗俾公司同事處理，會徵詢法律意見再採取下一步嘅行動，因為實在唔能夠姑息呢啲騙子。（成日被利用做騙案「主角」點算？）其實對付呢啲事件，又真係冇乜嘢特別嘅對策，都係見招拆招，我在明，人哋在暗，如果下次再見到類似嘅情況，唯有用自己嘅方法喺社交平台嗰度馬上澄清同聲明，等多啲人知道，減少其他人被騙嘅機會，當然最希望執法機關可以落力重點打擊呢啲網上騙案，因為實在有太多呢啲case不斷出現，唔單只係我，好多人都受影響。」他表示由於他早前真心為朋友Bonnie推介她的網上課程，教大家管理財務，可惜影片遭到不法之徒利用作為騙財工具，令Bonnie的課程同相關照片都被盜用，「最慘係有啲人都誤會咗Bonnie嘅課程都係呃人嗰啲，所以佢都好無辜受到牽連。」