世事政情

　　【晴報專訊】由李思捷主持及監製的無綫全新遊戲節目《思家大戰》將於本周日晚（29日）首播，首集嘉賓請來林盛斌（阿Bob）及朱凱婷，兩人為求勝出比賽出盡「口術」，狂數李思捷多宗罪，力踩他鹹濕及態度差，認真抵死。

李思捷重返無綫，被指是搶救收視。

　　林盛斌與朱凱婷帶同家人及朋友出戰比賽，合力爭奪每集接近五萬元的獎金獎品。遊戲形式相當簡單，製作組事先準備一連串與生活息息相關的問題，然後抽樣訪問100名市民，並將民調答案根據得票票數排上排行榜。嘉賓搶答排行榜答案以爭取分數，答案在排行榜愈高，分數也愈高，得分較高一隊方可爭取獎金獎品。

阿Bob與家人組隊，力爭獎金獎品。

　　首集遊戲過程峰迴路轉，原本一直領先的阿Bob隊，因為一個答案有閃失，令優勢迅即轉移至朱凱婷隊。首集節目的生活問題相當貼地，例如「即食麵配咩最好味」、「咩嘢size愈細愈無用」及「光頭嘅好處」等，雖然看似簡單，但嘉賓及現場觀眾經常「答極唔中」。

朱凱婷緊張過主持奧運

平日斯文的朱凱婷玩遊戲時，表現投入又激動。

　　至於引起現場最大回響的題目，絕對是「講出一個李思捷最乞人憎的地方」。雖然李思捷身在現場，但Bob與朱凱婷一於少理，淡定地力數思捷缺點，朱凱婷指思捷「衰鹹濕」；林盛斌更誇張，以「寸、扮型、扮勁、成日黑人面、態度差」力數思捷五宗罪，哭笑不得的李思捷唯有向林媽媽「投訴」︰「你個仔（Bob）仲寸呀！」平日斯文的朱凱婷玩得相當投入，更忍不住大叫︰「真係緊張過做奧運主持！」

　　李思捷主持的《思家大戰》於周日（5日）請來台慶劇《叠影狙擊》演員，對戰台慶主持人組合；由周秀娜率領的「叠影狙擊」 隊，隊員包括黃浩然、郭政鴻、關禮傑和蔡穎恩。鄧梓峰則領軍「台慶MC」隊的黎芷珊、馮盈盈、林溥來和吳幸美迎戰。

「叠影狙擊」隊有周秀娜（左起）、黃浩然、郭政鴻、關禮傑、蔡穎恩。

　　今集《思家大戰》火花十足，周秀娜透露在《叠影狙擊》中一人分飾兩角，而黃浩然則是大反派：「同周秀娜對手戲最多，由利益關係漸生感情，慢慢鍾意咗佢，所以拍攝時要揣摩一下。」而郭政鴻、關禮傑是一對兄弟，但卻有不少衝突場面，郭政鴻不慎劇透：「我哋呢套劇仲有好多反派！」

「台慶 MC」隊吳幸美（左起）、林溥來、馮盈盈、黎芷珊、鄧梓峰。

　　台慶MC隊則大展口才，個個牙尖嘴利，李思捷大爆鄧梓峰最「高竇」，笑謂：「節目播到第三季，用咗三季時間先請到鄧梓峰上嚟。」鄧梓峰一派輕輕鬆鬆解釋：「兩個原因啦，一嚟我要諗著乜衫上嚟節目，呢個問題都諗咗年幾；二嚟我要知點玩先夠膽上嚟玩，睇咗好多集參考一下先，即係好似我讀書咁，我要留幾年班先夠膽考會考囉！」令全場發笑。

鄧梓峰風趣幽默，大放笑彈。

　　黎芷珊分享任台慶司儀的感受，她最開心能著靚靚上鏡，李思捷衰多口：「你真人同上鏡都咁靚，我細細個就睇你。」黎芷珊聞言即鼓起泡腮扮嬲指住李思捷話：「你係咪要講細細個呀？」未玩遊戲，先有火花。

思捷衰多口「激嬲」芷珊姐姐。

　　正式玩遊戲時，李思捷問問題：「有一個相同性別孖生兄弟姊妹嘅好處？」周秀娜答：「可以頂替對方。」李思捷即問：「係咪好似你喺套劇入面咁？」周秀娜笑住回答：「唔係！但我哋share男朋友用。」眾人大為譁然，鄧梓峰搭嘴：「追同一個女仔，邊個得閒邊個去，我都有一對孖仔，呢方面佢哋就冇話我知，我估啫。」全場爆笑。

　　思捷重演名場面！

娜姐答問題好認真。

　　李思捷又再施展扮嘢本色，他曾在電影《勁抽福祿壽》中分別以四大天王、汪明荃和鄭少秋的聲綫講出：「周秀娜，你今次仲唔笑？」李思捷重演這句經典對白，大叫：「周秀 娜你今次仲唔贏？」相當搞笑。

「轉載自晴報」