世事政情

　　【晴報專訊】敖嘉年六年前與相戀16載的圈外女友Betty在加拿大秘密結婚，原以為夫妻恩愛多年，昨日卻驚爆敖嘉年疑背妻搭上蔣家旻，令女方背上第三者之名，及後敖嘉年為護花自揭已離婚三年多。昨日蔣家旻回應本報時，澄清無去敖嘉年屋企過夜，而她對男方也未有落閘：「有啲咩演戲上嘅嘢，我都會請教佢。」

敖嘉年16年與Betty低調結婚，但婚後甚少提及太太。（資料圖片）

敖嘉年在《鐵拳英雄》飾演奸到出汁的金耀龍，最終慘死可謂大快人心。(網上截圖)

　　現年45歲的敖嘉年，向來予人好好先生的形象，但昨日有報道指已婚的他與蔣家旻拍劇集《欺詐劇團》時擦出愛火，二人更在男方家中度春宵。敖嘉年受訪時，竟自爆早在三年前已離婚，強調與前妻和平分手，至今關係良好。雖然他否認跟年輕13載的蔣家旻拍拖，但坦承欣賞女方，更大膽取笑緋聞女友火爆兼「好惡」，對拍拖表示隨緣。至於蔣家旻一向緋聞多多，除了唯一認愛的朱敏瀚外，亦曾跟年長十載的麥秋成傳緋聞，看來她對成熟男士也不抗拒。

敖嘉年（後排中）與蔣家旻合作拍《欺詐劇團》相熟，二人戲裏戲外經常互窒。（資料圖片）

自稱未有心儀對象

蔣家旻否認去敖嘉年家中過夜，又自爆有圈外人追求。（資料圖片）

　　對於與敖嘉年的關係，蔣家旻昨日回應時否認拍拖︰「我無去過嘉年屋企過夜，去佢屋企嗰陣係有其他朋友一齊。」不過她與敖嘉年同樣對感情事表示隨緣，睇法相當一致︰「我無刻意諗過，對任何人都係，我偏向佛系，唔心急，所以隨緣啦。」她自言與敖嘉年因拍劇熟絡，大家有共同圈外朋友，她對這位前輩讚不絕口︰「佢人品好又好正氣，有啲咩演戲上嘅嘢我都會請教佢，佢都會同我分享。」蔣家旻又指自己命格中有桃花運，所以對感情事一直抱正面態度，她直言︰「暫時無心儀對象，有圈外人想識我，大家係普通朋友，未有進一步發展。」至於敖嘉年則以「趕配音」為由，拒絕再回應。

羅天宇自薦做姊妹

蔣家旻與羅天宇（中）情同兄妹，而她亦曾跟麥秋成（左）傳緋聞。（資料圖片）

　　另外，與蔣家旻以兄妹相稱的羅天宇，對「阿妹」的緋聞半信半疑︰「佢有戀情應該會話畀我知，咁否認得，應該就真係唔係嘅。（蔣家旻鍾情成熟男士？）咁我又唔係好清楚，要再觀察下先知。」至於「阿妹」與敖嘉年是否合襯？天宇回應︰「同敖嘉年合作得唔多，要認識多啲先知，不過如果阿妹真係有新戀情，我一定會祝福佢嘅。」天宇笑言希望蔣家旻結婚時會請飲︰「到時我唔介意反串幫佢做姊妹團㗎。」

　　【晴報專訊】早年贏得無綫台慶頒獎禮「飛躍進步男藝員」的敖嘉年，效力無綫24年間演活不少「奸仔」角色；他前年離開娘家後即成功轉型，穿梭不同平台拍攝綜藝節目、劇集及舞台劇，甚至開班教演戲，可謂「百足咁多爪」。嘉年感恩在「疫境」下仍能多方面嘗試，更有望轉戰幕後做節目監製，「嚟緊有好多projects，內地同外國嘅都有，疫情緩和就會開工！」絕對是離巢無綫藝人的成功例子。

嘉年希望涉足幕後，探索演藝生涯更多可能性。

　　敖嘉年與梁嘉琪主持的香港開電視節目《嘉嘉醫療自助班》正熱播，兩位主持訪問26位不同專科醫生，探討各種健康問題，嘉年笑言乘機自肥，私下向醫生請教。現年45歲的嘉年，將大部分青春投資在TVB，由90年代主持《城市追擊》開始，到近年成為劇集「御用奸仔」，最突出的角色包括《巾幗梟雄》蔣必文、《鐵拳英雄》金耀龍等。嘉年認為，金牌監製李添勝是其演藝生涯最重要的伯樂，「咁多年嚟拍過好多添哥監製嘅劇，好多角色都戲份重，即使曾經有幕後人同佢講話我唔得，佢都堅持用我畀足信心，之後拍《巾》劇攞到獎都係一個肯定，好緊要。」

嘉年與梁嘉琪相識十多年，卻首度拍檔做主持。（網上截圖）

09年，敖嘉年憑《巾幗梟雄》贏得「飛躍進步男藝員」，成就事業高峰。（資料圖片）

擔任戲劇導師

　　另一位無綫監製文偉鴻，亦對嘉年影響深遠，他說：「佢開劇經常搵我做又奸又衰嘅角色，反應都好好，16年佢執導《使徒行者》電影版都搵我配音；之後《城寨英雄》大奸角馮春美本來都搵我演，不過當時要去英國同內地拍《葉問4：完結篇》，撞咗時間。」前年毅然離巢無綫，是否覺得多年來欠缺運氣？嘉年說：「我都係盡力做，去到乜嘢位置好難控制，外界講到我點差都好，自己又無呢個感覺。」事實上，他離巢後從未停步，除了即將推出新歌，更初執教鞭，為演藝課程擔任戲劇導師，「好多謝高志森搵我開班教成年人，佢想發掘下新演員，訓練班仲有ViuTV嘅演員。我都驚應付唔到，但做導師自己又可以溫故知新，同學生交流嗰陣，會記得唔同嘅演戲方法。」

嘉年（左）化身導師教演戲，嘗試人生第一次。（IG圖片）

　　教戲以外，嘉年透露將進軍幕後，開拓內地市場。「19年內地有project搵我做監製，後嚟因為疫情無得北上，所以計劃要煞停，相信通關後會再搞，依家留喺香港做唔同工作。（做節目監製）係我未來嘅重心，因為可以多啲自己想法。」他指內地戲劇市道興旺，又透露原本為兩部網大（網絡大電影）做男主角，但因隔離檢疫時間長，難以內地香港兩邊走，最終錯過機會。不過，他仍十分憧憬內地發展，「內地網大風氣好勁，又製作好多七至13集嘅劇集，依家都係睇情況，如果隔離檢疫時間縮短就會北上。」他指除了內地的工作計劃，他亦有其他外國project，相信他在通關後有排忙。

讚蔣家旻聰明肯學

嘉年為ViuTV拍《野人老師》，不少台前幕後也是無綫舊同事。（IG圖片）

蔣家旻與嘉年的年紀相差13年，但外形合襯。（資料圖片）

　　目前留港工作的嘉年，依然密密做無停手，除了剛完成ViuTV劇集《野人老師》，跟MIRROR成員邱士縉（Stanley）及陳瑞輝（Frankie）合作；又即將回另一娘家香港電台開咪主持節目，自由身的他依然工作不斷。感情方面，嘉年今年二月忽然與劇集《欺詐劇團》拍檔蔣家旻傳緋聞，惹來偷食疑雲的嘉年立即澄清自己已離婚三年。提到這位緋聞女友，嘉年表示彼此只是間中有聯絡，他大讚女方：「佢係一個好聰明、好肯學嘅女仔。」談到TVB花旦競爭大，嘉年說：「佢一向都肯交流，我會鼓勵佢繼續努力，演戲方面，我都會畀到意見佢。」