世事政情

　　【晴報專訊】姜濤最近推出新歌《Dummy》自嘲要打頭敲醒自己，藉歌曲提醒自己要接受不同聲音。昨日姜濤到商台接受《叱咤樂壇》訪問，重提一月叱咤頒獎禮上的演出，他透露翻看片段時的感受︰「好辛苦捱過三分鐘，我同大家一樣都好難捱。」對自己表演十分不滿的姜濤，自爆向公司提出雪藏自己，好好反省及沉澱下來。

姜濤灌錄新歌《Dummy》時，特別邀請中文老師糾正咬字。（IG圖片）

　　姜濤昨日接受商台訪問，首次剖白在《叱咤頒獎禮》演出失準後，自己近半年的心路歷程。DJ謝茜嘉問叱咤演出對他影響很大？姜濤說︰「話無影響就一定係假，（落台後唔滿意？）已經知道有啲唔對路，無諗過之後報道係海量，係我入行五年來比較deep（沉重）嘅一段時期。」姜濤向來緊張自己的演出，但一直不敢翻看當晚表演，「我隔咗個幾月都唔敢睇，後來的起心肝，知道唔可以再逃避，於是我喺屋企開嚟睇，好辛苦捱過三分鐘，我同大家一樣都好難捱，真係好難捱；我無後悔做呢個表演，做歌手係表達當下情緒，但的確唔成熟同埋脫離表演本質。」

姜濤昨日公開跳女團BLACKPINK成員Jisoo的「開花舞」。（IG截圖）

自認不成熟

　　姜濤自爆曾打算沉澱一下，不出歌一年，更考慮過拒絕辦個人演唱會，並向公司提出要求雪藏自己，「嗰段時間成日跑山，同公司講『不如你哋雪我啦』，前幾年真係衝太快，太多嘢太快得到，好容易迷失，我覺得係上天安排要我靜下。」幸好姜濤最終轉念，推出《Dummy》來自嘲，才成功釋懷，「每件事都有兩面，唔好嘅事睇到背後嘅意義，都可能成為一件好事。」

姜濤在IG出po擔心在電台外守候的粉絲辛苦，完成訪問後，他主動為粉絲簽名，十分貼心。（IG截圖）

姜濤重遇曾經在個人FB批評他的梁文禮（左一），完全沒有芥蒂。（IG截圖）

　　MIRROR 12子成軍以來，儲下不少鏡粉，當中最受歡迎的姜濤和盧瀚霆（Anson Lo）的支持者最多。隨著入行越久，粉絲肉緊偶像的成績，大家都各持己見，有時在活動上，發生衝突磨擦。近日情況愈演愈烈。日前有鏡粉在香港機場，等候MiRROR巡迴演出後回港，等候期間疑因霸位問題發生爭執，有人聲稱受傷、亦有人告稱電話被搶走。姜濤22日出席謝票活動後回家，開直播發表內心感受，直言這些事情發生，曾檢討自己是否做得不夠好，引發大家的行為。

　　姜濤做完《12怪盜》謝票活動後，回家開直播與姜糖對話，甫開始的時候，他表示太耐冇開直播，心情比上台表演更緊張，不時嘆氣，而直播期間更一度感觸，聲線似想哭。間中會語出驚人的他，還安撫大家放心：「我只係想分享一啲事，包括最近發生嘅事，係咪好驚唔知我想講乜？我知我以前成日亂講嘢，放心唔會嘅。我唔係想教導大家，只係想交流吓諗法，希望你哋睇完直播，再作出評論。」

　　對於最近鏡粉的衝突，姜濤離開香港18日去做巡迴演唱會，回來反而要「拆彈」，他苦笑：「始終離開咁多日，好掛住呢度， 懷住開心心情終於返屋企， 稍為唞一唞，再努力出發下一站， 但冇諗過發生呢啲事。我同Anson Lo喺機上面知道呢件事，大家有商量點做，但好難解決。」

　　姜濤表示曾經嘗試了解件事發覺， 但發現每個人都有不同說法，根本沒有辦法可以考證真實情況，而且亦覺得現時最重要作出呼籲聲音：「 想呼籲大家發生乜事， 以安全為主， 呢個係我哋一直所有人抱住嘅態度。」

　　隨後，姜濤表示曾檢討事情，反思自己是否有地方做得不對：「我同Anson Lo都有諗過， 係咪有地方仲做得唔夠， 做多一步或者可以減少事情發生， 我係咪要同大家講對唔住， 我哋唔知再可以點做，只可以講聲抱歉。 每個藝人都唔想粉絲受任何傷害， 身為藝人責任， 係帶歡樂畀所有人 。」

　　姜濤強調入行以來，粉絲間的衝突愈來愈多，坦言之前曾為這些事情，與Anson Lo內心感不快：「我有佢都有唔開心，我地關係曾因為呢啲事影響過， 但由《全民造星》到而家出道幾短短日子經歷好多， 我哋一開始都係好單純後生仔， 我哋有互相唔理解過， 但我哋後來知道， 明白大家緊張我哋，先會有咁嘅事發生， 好彩我哋而家係好好朋友。」講到這裡，姜濤不禁透大氣。

　　本月30日是姜濤生日，他公開透露自己25歲的生日願望：「 希望世界所有人，有個將心比己嘅心態，世界係冇啱定錯， 只係唔同觀點、立場、睇法。如果有事時候，你可以唔認同人哋，但用人哋立場去睇， 可能會多份理解。」最後他十分擔心，怕做完直播後又再被罵「搏同情」等評論，但他表示人會長大，會聽別人的意見，不想只做活在自己世界的藝人，不再逃避外間任何「聲音」。

　　至於Anson Lo回港當天，曾經回應衝突事件，同樣他曾經因此事感心灰。姜濤在IG做直播後，Anson Lo亦在限時動態出帖文，有多條片段他離開時，獲得神徒們的呼喚。之後他則有一張文字帖文，「謝謝你們每一位，希望今天能夠帶給你們一點歡樂，一個放鬆的時刻，想你們開心，感觸、感動、感激。」