世事政情

　　【晴報專訊】蔡潔近日憑話題劇集《一舞傾城》而人氣急升，又獲無綫力捧，星途無限，桃花更相當旺盛，有傳獲猛料富商及拍檔何浩文同期力追。昨日蔡潔和練美娟（娟姐）出席寵物酒店開幕，她對傳聞一笑置之，並強調一直靠努力養活自己。

蔡潔近來新聞多多，早前與黃宗澤傳緋聞，近日又傳被富商及何浩文同期力追。

　　蔡潔昨日帶同四歲愛貓「豬仔」出席活動，近日有報道指一名富商以銀彈攻勢向她展開追求，而《一舞傾城》拍檔何浩文亦對她大獻殷勤，對此蔡潔都一一否認，「完全無啲咁嘅事，我依家係單身，亦都無人追。」有傳何浩文飛去寧波和北京探班？蔡潔解釋︰「因為劇組有佢嘅朋友，佢唔使開工就飛過嚟探佢哋，跟住一大班人出去玩，總之我依家唔諗拍拖，專心工作。」

有傳何浩文為追求蔡潔，飛內地探班。（IG圖片）

　　可擔心報道令人誤會被富商包養？蔡潔表示︰「都無咁嘅事，我都唔知點解有呢啲傳言，所有衣食住行都係我自己賺錢，我想遲啲爸爸媽媽嚟香港，可以有個舒適環境，所以搵一個自己鍾意嘅居住環境，有部自己嘅車，呢啲都係做呢行嘅基本配套，所有嘢都係我可以應付嘅。」她又指沒有要求另一半是圈中人或圈外人，又無奈說︰「一切隨緣啦，被人寫成咁邊有人夠膽追我。」

練美娟到非洲拍旅遊特輯

　　另外，娟姐帶同九歲愛犬「烏冬」到場，她大讚愛犬︰「佢好似主人咁，好乖又文靜。」娟姐又透露將會到歐洲或非洲拍攝旅遊節目，此行會去較冷門的地方取景，有心理準備要攀山涉水，「今次唔係去啲大路嘅吃喝玩樂景點，我都驚辛苦㗎，惟有當減肥。我唔怕玩笨豬跳嗰啲，最驚係拍動物大遷徙時要我一齊跑。」

娟姐即將出埠工作，現正物色寵物暫託服務。

　　演員文凱玲（Connie）劇集《狀王之王》中飾演青樓「倚春閣」的老闆娘葉三娘，獲觀眾大讚有氣質，尤其是去年播出的《一舞傾城》中，Connie雖然同樣飾演妓女的角色Money，不過兩者的性格就大為不同，Connie都成功駕馭，難怪不是女主角都一樣出眾。

（文凱玲IG）

　　41歲的Connie近日放口風終於有「嫁期」，事關其實早於4年前她已經接受加拿大的外籍男友Jason求婚，不過由於工作太忙，再加上疫情的關係，婚事一拖再拖。近日，Connie完成過大禮儀式，正式準備做靚靚新娘。Jason雖然在外國長大，不過他堅持為未婚妻跟足中國傳統辦過大禮儀式，更相當「重手」準備大批金器、花膠海味等，加上其他禮物，足足放滿八大禮籃，光看照片都覺得大為壯觀。據知，Connie將於3月中舉辦婚禮，正式榮升做人妻。

　　她早前接受《晴報》訪問，「開頭諗住唔急，等等吓就疫情開始，一等就等咁耐，拍《一舞傾城》之前本身就開始籌備，但嗰年成年都唔喺香港，喺內地連續拍三個劇。」文凱玲透露由於男朋友喜歡她長頭髮，所以一直留長頭髮準備拍結婚相及結婚，不敢剪短，「我應承佢留長頭髮，佢都應承我練大隻，可以半裸同我影結婚相，結果佢冇做到囉！我就慢慢好長、好重都唔敢剪。」問到會否覺得事業耽誤婚事？她說：「都唔會，我哋一齊都六年，有諗過不如唔好搞婚禮，好多人都以為我哋已經結咗！不過唔緊要啦，人生點都結一次啦！」她笑言感激角色入屋，早前到不同結婚場地視察時，都被認出兼嗌「Money」，令她非常開心。