2019-07-10
ERROR肥仔客串林海峰MV勁搶鏡 粉絲︰舞出色
【晴報專訊】將於九月在紅館開七場棟篤笑的林海峰（Jan），早前邀得肥仔@ERROR為棟篤笑主題曲《我今朝有啲唔舒服》客串拍MV。一向身手敏捷的肥仔，雖然未有獻聲只負責伴舞，但他如電兔上身活力十足，不少樂迷Like爆肥仔「彈出彈入」正到爆；有人亦戲言他搶盡Jan風頭！
《林海峰是但噏Happy Monday 2019》的主題曲《我今朝有啲唔舒服》近期在商台熱播，歌曲唱出普羅大眾面對Monday Blue的苦惱，想出各種方法扮病唔想返工，歌詞道盡打工仔心聲。MV前日在YouTube發布，Jan率領一班舞蹈員跳足三分多鐘，雖然只得一個辦公室場景，但導演以三鏡到尾的拍攝手法，令MV拍得流暢自然。
肥仔表情豐富，在MV中非常搶戲。
然而，MV最矚目是客串的ERROR隊長肥仔，甫開始由他打頭陣，以強勁爆發力單腳跳進辦公室，鋪排主角Jan登場。
演藝工作密麻麻
年過50的林海峰在MV中盡展舞技，可謂寶刀未老。
一向跳得的肥仔，未有令網民失望，以充滿力量的舞姿配合其可愛身形，吸引觀眾視綫。直至歌曲中段，肥仔再次彈入大跳Locking，配以鬼馬表情，絕對交足戲。到了MV尾聲，他再度登場，聯同Jan及其他舞蹈員跳群舞，他扭動肥腰，令畫面十分震撼，MV完結前，肥仔更與主角Jan互動，在對方面前扮忙講電話。不少網民激讚肥仔為MV加分，有人亦大讚MV充滿歡樂氣氛，肥仔演出值得一讚。
Jan碰上ERROR隊長肥仔，二人成功製造話題。
其實，肥仔早前曾為陳小春的巡迴個唱擔任舞蹈員，現時ViuTV正熱播他有份主持的《Cooking Gigi台灣篇》，日前他更與ERROR隊友到台灣拍攝《花姐ERROR遊2》，工作安排頻密無停手，未知Jan又可會在九月開騷時找他登上紅館演出呢？
轉載自: 晴報
全新節目《說說心理話》青少年不可以戀愛！？真實個案講述驚心動魄經歷► 即睇
