女人埋堆講Shopping，男人埋堆講波經。適逢英超開鑼，曼城冇乜意外，都應該穩袋今年英超冠軍，但其餘Big 5為咗爭亞軍，又係另一場緊張刺激嘅鬥爭！老實講，作為女性，波，真係少睇！但係點解連我都講得出今年英超賽果？因為公司有位男同事自製「外圍」，自己做埋莊家，日日熏陶同事向佢買波！

　　原本呢位男同事，只係一位喺大家眼中比較勤力賺錢嘅同事。打份正職之餘，仲出面搞其他小生意，賺下唔同渠道嘅錢。直到有一日食飯，男同事話題講到波經（當時處於對足球一無所知嘅我，真係記唔起佢地講過咩），再加上當晚六合彩派彩獎金高達一億，神推鬼使嘅情況下，大家食完晏竟然齊齊去咗馬會買六合彩！問心，平時冇買開六合彩嘅讀者，一億派彩當日你哋有冇買六合彩？相信大家都只係「襯熱鬧，買個機會」先會加入賭博。如是者，男同事似乎被呢次契機啟發到，認為「波」同「話題」可以好似一億六合彩咁，吸引到non target group 嘅人都一齊參與。所以，由嗰餐飯開始，同事就展開左佢嘅外圍大王計劃！

　　首先，佢要催眠我哋！同事失驚無神將自己電腦、手機嘅wallpaper轉晒做動態英超球員嘅相，等我地班零知識嘅女同事將唔同球星記入腦！同時又喺個人社交平台不斷share同post有關英超球員買賣、練波、受傷，甚至私生活嘅消息，務求無聲無息地將我哋洗腦。除咗潛移默化手段，緊係仲會有實際行動啦！由計劃開始嗰日，男同事閒談嘅話題就係同英超有關！「星期六、日放假冇出街，喺屋企睇波」、「全球100大最靚面孔都冇xxx（我又記唔到佢講邊個球員），佢又靚仔又好波」、「電話plan就快完約，跟pccw簽喇，加埋now英超頻道抵好多！」等等！

　　或者有人話：「車，咁人哋呢排先愛上睇波吖嘛！講下都唔得？」

　　日講夜講叫「球迷」，但要成為外圍莊家嘅最後一步，緊係要開盤比大家落注！當男同事發現洗腦情況差唔多，就開始露出真面目！適逢比賽日，大家一定會收到莊家男的投注落盤whatsapp。投注金額不限，仲可以拖住數，返工先找數！聽落莊家男好似好無恥，推同事落賭海賺佢地錢，但出奇地都有唔少男同事參與賭博！嚟緊仲有世界盃，如果你突然收到朋友撩你賭波咁邀請，好可能已經跌左入莊家男嘅名單之中！

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

etnet榮獲HKEX Awards 2023 「最佳表現證券數據供應商」大獎► 了解詳情