收藏文章 

2018-02-09

九巴推月票$780任搭 劉國勳今鋪攞晒彩

  新界過海返工嘅打工仔有福了!運輸署今日批咗九巴個月票計劃,個計劃涵蓋大部分路線(包括聯營隧巴路線、通宵路線及旅遊路線),一日最多可以搭10程九巴路線服務同埋兩程B1號線服務(即係來回落馬洲嘅路線),價錢仲要係780蚊咋!下個月就有㗎啦!

 

 

乘客可以由下星期三(14日)開始,用八達通喺售賣機買3月嘅月票。(九巴圖片)

 

  Jenny有位住「大西北」嘅同事聽到個消息簡直係感動到痛哭流涕,事關佢成日同Jenny呻,日日由元屯天(元朗、屯門、天水圍)過嚟港島返工,一個月落嚟車費就已經冇咗張金牛!有呢張月票嘅話,慳返嘅錢,應夠High個Tea喎!而家面價係780蚊,若果配合埋政府之前講嗰個交通補貼計劃,月票價格就相當於685蚊,聽落確唔錯!

 

75折搭車 都好吖

 

  咁呢張月票係點用法呢?Jenny幫大家問過九巴嗰邊,佢哋會喺九龍同埋新界嘅主要有蓋公共運輸交匯處同巴士總站,整返個九巴月票售賣機。乘客可以由下星期三(14日)開始,用八達通喺售賣機買3月嘅月票,交易成功月票就會自動記錄喺張八達通卡入面,每張八達通可以同時買及記錄到當月同埋下個月有效嘅月票,咁就唔使袋多張卡喇!

 

  九巴仲幫大家計過,以元朗來往銅鑼灣嘅968號巴士為例,一程係23.4蚊,如果返22日工,每月車費係1029.6元,用月票就慳到249.6蚊,即係折咗75折。雖然而家淨係出咗一種月票,Jenny估短中途嘅乘客就未必受惠到喇,但係對於住新界要過海返工嘅打工仔嚟講又真係幾抵噃!

 

聯營線只係九巴用得 

 

  不過大家唔好太開心住,呢個世上冇嘢係完美嘅!呢張月票雖然包埋同城巴新巴聯營嘅隧巴路線,但係九巴個服務員姐姐同小妹講,張月票係要搭到九巴架車先可以用到,如果上咗架城巴,都係會扣返本身八達通啲錢㗎!Jenny已經預視到,個個都喺巴士站排晒長龍等嗰架九巴,結果上到車都冇位坐,就咁搖成個鐘返屋企都幾辛苦……希望九巴同運輸署快啲手同城巴公司傾掂數,有優惠就齊齊推出,等大家唔使企喺到食風喇!

 

劉國勳彷似月票代言人今鋪攞晒彩

 

  少少題外話,今次九巴推月票得到唔少市民掌聲,民建聯劉國勳今鋪威啦!次次放風都係佢,簡直就做咗代言人咁款,大家應該好快就會見到「成功爭取」Banner出現喇!之不過,據Jenny所知民主派嗰邊其實有少少唔太Like對家攞晒彩,皆因巴士月票呢壇嘢唔同黨派都有跟開,但政府就淨係放風畀建制派……唉!睇開啲啦!親疏有別都唔係第一日啦!更何況選舉近了?

 

更多言歸政傳文章
  • 2018-02-12

    帆哥凡事爭住答 激到Tanya跳跳紥

    今日係《廣深港高鐵(一地兩檢)條例草案》委員會(即係一地兩檢法案委員會)嘅第一個會議。「一地兩檢」咁有爭議,各位議員就梗...

  • 2018-02-06

    饒公殞落 如此曠世之才還有何人?

    國學大師饒宗頤今日凌晨逝世,享年101歲。今朝各方名人都紛紛哀悼,饒公嘅弟子、前港大副校長李焯芬話饒公係睡夢中安詳離世,...

延伸閱讀
即時報價
全文搜索
Search
最近搜看
財政預算
More
Share