鳥結糖有分軟身或硬身兩款，而我就喜歡吃硬身碎那款。以前見大部份食譜都係要用蛋白去做，又要煮糖漿煮到百幾度，又要控制溫度，又要買枝探熱針才可以做到，咁麻煩，唯有出街買來吃算把啦！

 

　　其實，想自己做唔係唔得，韋太有一個簡易的版本可以教大家。最多成本貴少少，最重要快、靚、正！

 

　　網上有好多自製鳥結糖的模具及包裝工具，大家有時間可以在網上訂購一套來製作。如無模具，還可以用簡單的器皿去做，只是隨意分割大細粒，絕對無問題的。

 

　　各家長們還可以趁兒童節，與囝囝囡囡一齊玩這親子製作玩意啦！真係有得食，又有得玩！

 

製作時間：45分鐘

份量：40粒（400克）

 

材料：

 

 

A) 棉花糖    150 克  + 牛油  40克

B) 奶粉      90克

C) 花生碎 / 果仁  90克

D) 紅莓乾    30克

 

做法：

1. 花生放入已預熱160度的焗爐，焗10-12分鐘，焗至金黃色或鬆脆，放涼去衣。

 

 

2. 易潔鍋開小火放入牛油煮至半溶，再加入棉花糖轉中小火煮至溶化。

 

 

3. 加入奶粉快手攪勻至沒有粉粒，大約攪1分鐘，熄火加入花生碎拌勻成糰，即可移至牛油紙上或模型模內。

 

 

4. 糖面蓋上另一張牛油紙，壓至約半吋厚，用木棍堆平四邊。

 

 

5. 放涼5分鐘，用刀切開一粒粒，用糖紙或先用食用糯米紙每粒糖包裹好，入袋封好。

 

 

小貼士：

1. 如買了大粒裝棉花糖，最好預先剪細才去煮，較容易煮溶。

2. 製作完最好盡快切件，雪凍太硬容易切碎。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

etnet榮獲HKEX Awards 2023 「最佳表現證券數據供應商」大獎► 了解詳情