世事政情

2019-01-16

準媽媽鬥靚陳凱琳中門大開 Vs 香香曬腳

　　【晴報專訊】兩位準媽媽陳凱琳（Grace）與岑麗香（香香）昨日到沙田出席護膚品活動，她們均性感現身，穿上紅色傘裙的Grace胸前「中門大開」，大騷升Cup上圍；香香則長腿示人，不過腳踏四吋高踭鞋的她上台時一度站不穩，相當驚險。

陳凱琳指鄭嘉穎對她無微不至。

　　陳凱琳與岑麗香一見面即雞啄唔斷，提到懷孕六個月的香香上台時似乎險些跌倒，她淡定笑說︰「我覺得無！（事前告知老公強強穿高踭鞋？）我著一個鐘之嘛，上到車就唔著，會換拖鞋。」而Grace陀B後明顯上圍升Cup，身材豐滿更有信心騷本錢？Grace笑說︰「配合活動揀條啱色嘅裙，著傘裙條腰舒服啲，老公（鄭嘉穎）都見過，佢讚我靚！」

　　二人難得同場，即時交換陀B心得，她們不約而同表示懷孕後容易疲倦，經常要去洗手間。Grace笑言大家第一次懷孕，很多時會互相分享，更大讚老公鄭嘉穎為了她，獻出煲湯第一次︰「有次我做訪問話想飲湯，佢睇咗報道就立刻買材料，煲瘦肉冬瓜火腿湯畀我飲。佢知我鍾意飲中湯，啖湯好甜好好味，覺得好感動。」她坦言不會恃住自己懷孕而諸多要求：「老公有心就得，我知佢好錫我！」

無意效法祖藍直擊生仔

岑麗香自言陀B後成熟不少。

　　至於香香笑言陀B後變得大膽，勇於面對平日最怕的曱甴：「我一向好驚曱甴，但因為好快唔止我一個人，將來要照顧小朋友，所以我放膽用紙巾冚住曱甴，再一手拍落去殺死佢。」她笑指老公強強也成長不少，做很多資料搜集，務求將香香及BB照顧得更好。「我間中都有放肆，但我唔想咁公主，唔想淨係坐喺度，間中做下運動郁多啲。」

　　提到王祖藍早前拍攝內地真人騷，電視台更全程直擊他陪太太李亞男生B的過程，問她們會否仿效對方？香香說：「我又未必，因為我比較怕醜。不過我抱過祖藍嘅BB，好得意，其實兩個都似，五官係祖藍縮細版囉，放喺面上好精緻，輪廓就似李亞男。」

轉載自: 晴報