世事政情

2021-01-20

被樂易玲爆TVB長約超過8年黃心穎談去留：有消息再Update

　　【晴報專訊】前年四月爆出「安心事件」的黃心穎，被無綫雪藏近兩年。近日有傳無綫無意「放生」仍有八年長約的心穎，昨日無綫高層樂易玲現身活動，暗示心穎暫難復出︰「無理由要佢再出嚟畀人講，都要睇觀眾接唔接受！」心穎回覆《晴報》稱︰「工作的事，有消息再同大家Update。」

　　本周末將踏入32歲的黃心穎，由「安心事件」至今，沒有現身任何公開活動，就算更新社交網，也只是分享與愛犬及家人相處的點滴。不過外界多次傳出心穎有意復出幕前，她主演的《丫鬟大聯盟》、《牛下女高音》已先後推出，《堅離地愛堅離地》亦快將播完，雖然她的戲份無被刪減，但未知是否她在香港娛樂圈的告別作。

心穎（左二）演出的《堅離地愛堅離地》，拖足三年才於去年尾播出。

　　日前有報道指心穎與無綫尚餘八年合約，但TVB無意放生，令她前路茫茫。無綫高層樂易玲昨日出席活動，被問及心穎近況，她直言上周與心穎一起吃早餐︰「心穎心情OK，咁耐無見，關心下佢！」樂小姐坦言雙方曾商量復出︰「佢咁後生，但未有（復出）呢個想法，佢都開心，亦有朋友關心！疫情關係佢都有做運動，狀態好fit。（心穎繼續留在娛樂圈？）大家無深入去傾，唔想畀心穎壓力，不過傾到尾聲都有問佢有乜打算，留低定離開，都有叫佢認真想想，佢其實都有去諗！」

如解約不用賠償

樂易玲（右）昨日暗示心穎若選擇繼續留在娛圈，前路必定崎嶇。

　　樂小姐坦言心穎與TVB早年簽下長約，即使決定離開，也要返電視城處理合約問題，她希望心穎不要意氣用事：「我都係關心佢，離開後想做乜同有乜計劃，會再約佢傾！」有指心穎被無綫綁死八年合約，樂小姐直言︰「唔止八年，當時打算捧一批花旦，所以佢哋都簽咗長約！（解約要賠錢？）唔使，並非錢嘅問題，佢又唔係跳槽，相信佢有好嘅想法去行將來嘅路。心穎仲係後生女，我都係人阿媽，唔知觀眾覺得佢點，佢做錯咗想離開，都想同佢分享幫下佢。」

心穎舊愛馬國明現在情歸湯洛雯，更不時高調放閃。

　　若果心穎希望留在TVB，公司可會幫忙？樂小姐稱︰「唔係主觀話佢想就想，佢出嚟做嘢，都要睇觀眾接唔接受；如果人哋唔接受，無理由要佢出嚟再畀人講。好似我哋最佳男主角（馬國明）都搵到個咁好嘅女朋友（湯洛雯），所以呢個缺口（心穎）都要處理。」本報昨晚聯絡心穎，問及樂小姐擔心如她復出，觀眾會不接受，心穎稱︰「沒有回應，工作的事、有消息再同大家update，多謝關心。」