立法會修訂《逃犯條例》嘅法案委員會「鬧雙胞」呢壇嘢今日繼續，不過比起星期六嘅激烈程度已經好返少少，事關由建制派推舉為主持嘅經民聯石禮謙見到今日情況仍然咁混亂，直情把心一橫，極速宣布休會！

 

 

20秒完事

 

　　Jenny見到石禮謙入到去，全程就淨係講咗3句說話：「我宣布會議開始，但係而家環境太惡劣，我宣布會議結束！」20秒都冇就完咗喇！速度之快，Jenny同一眾行家都反應唔切吖！

 

　　連續兩次會議都咁混亂，似乎變咗成死局。獲民主派選出嚟嘅主席涂謹申就提出同政府同建制進行三方會談，建制派都話好，點知政府就話呢個係立法會嘅程序問題，行政機關唔應該干預喎！

 

個波拋來拋去 又拋返內會度

 

　　咁咪即係將個波拋番畀立法會？再加上林鄭星期四又要上大陸搞大灣區事務，要對話就淨係得返聽日，政府今日又咁強硬，咁搞法，睇嚟呢個風暴有排都使旨意過喇！

 

　　點知喺呢個風頭火勢，身在暴風眼中嘅石禮謙喺下晝就同記者講「我唔Do喇！」佢話，相信下次再舉行會議都係選唔到主席，直指自己「我無能，點可以做（主持）呢！」此話一出，都真係夠「史無前例」喇！

 

嫌自己無能唔Do？石禮謙：講笑啫！

 

　　件事仲未完㗎！晏啲Jenny同行家撞到石禮謙，就梗係追住佢問呢單咁爆嘅消息啦！佢就話：講笑啫！仲話而家唔係佢話做唔做，係成件事做唔到，所以咪未去信內會尋指示。

 

　　不過，如果石禮謙一旦唔做，咁建制派下一個可以搵邊個做主先？Jenny睇返資料，原來喺建制派入面仲有一位議員係同石禮謙一樣資深，都係做咗5屆立法會議員，佢就係自由黨嘅張宇人喇！根據返建制派之前推舉石禮謙出嚟嗰時，話要搵建制派最資深嘅議員主持大局，因為立法會最資深嗰兩位議員都係民主派，而「民主派信唔過」，所以如果要換人，睇嚟張宇人你責無旁貸喇！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

etnet榮獲HKEX Awards 2023 「最佳表現證券數據供應商」大獎► 了解詳情