加入最愛專欄  收藏文章 

2019-05-28

四叔榮休喇! 回顧4大致富之道

  今日最大單嘅新聞,都非恒基地產(00012)主席兼總經理李兆基「四叔」退休莫屬啦!四叔噚晚已經預告咗先,今日出席股東周年大會之後就會交棒畀兩個仔,李家傑同李家誠,由佢哋兩人會出任聯席主席兼總經理。

 

 

 

最後交棒嘅「富一代」

 

  唔經唔覺,四叔已經係「四大家族」入面,最後交棒嘅「富一代」喇!其中新世界(00017)嘅鄭裕彤同埋新鴻基地產(00016)郭得勝已經長埋黃土,而香港首富、長實(01113)主席李嘉誠都喺上年退咗休,加埋今日四叔退休,四大家族都交晒棒嚕!新一代會點將盤生打理成點?大家拭目以待!

 

  回顧返四叔嘅生平,佢屋企本身係開金舖同銀號,經營黃金同埋外幣買賣,做得呢行應該都非富則貴喇!而四叔自己就6歲已經去學做家族生意,仲畀佢發現鋪頭嘅鑄金師傅喺鎔金嗰陣中飽私囊,最後佢都係覺得自己先係最信得過,決定自行鑽研黃金技術。

 

土儲No.1!  4個致富之道

 

  不過,四叔最為人熟悉嘅都唔係佢啲「金」,而係佢啲「地」。喺1963年,四叔同郭得勝、馮景禧創立「新鴻基企業有限公司」,並喺1972年上市,之後1975年就拆夥,四叔去咗成立恒基兆業有限公司,去到1981年上市。而四叔最鍾意就係收購新界農地,覺得新界農地「成本低、利潤高」喎!所以恒地已經係有最多農地土儲嘅地產商嚟㗎啦!

  

  Jenny記得,四叔曾經喺一個大學演講時分享4個致富之道,第一個係「刻苦耐勞,勤奮努力」;第二係「經濟未定,不易早婚」;第三係「要有第一桶金,以錢搵錢」;第四就係「男最怕入錯行,女最怕嫁錯郎」!不過雖然人人都想學四叔咁有米,唔通人人都可以學到咁有米咩!Jenny都好認同要錢搵錢,首先要有第一舊錢,只不過喺而家嘅香港,大家想搵第一舊錢就真係談何容易呢!

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

「港元定存息率」大比拼 食息都要食得醒 https://goo.gl/i9KA4Y
更多言歸政傳文章
你可能感興趣
#四叔 #恒地 #致富之道 #李兆基
編輯推介
即時報價
全文搜索
Search
最近搜看
夏日特輯
置業不是夢
More
Share