過往專欄

2019-02-14

【腦細「欏柚痕」】帶埋寵物返工放鬆下？　原來上司為刷存在感，真係可以去到好盡

　　香港地養一個小朋友由400萬，變到而家打個double都唔知養唔養到，除咗因為物價貴咗、大家要求嘅生活質素office 亦好咗，因此香港人負擔越黎越大，好多人而家選擇唔生小朋友，轉為收養毛孩。身邊好多朋友都將毛孩當正自己仔、女一樣看待，有時真係做貓做狗都好過做人。同樣身為貓奴嘅我，深明大家愛寵有幾深切，但偏偏無腦上司想整死我個「女」！各位奴隸又會唔會同上司死過？

　　話說過年前，公司「欏柚痕」搞咗啲社會責任活動，其中一個活動就邀請咗一個非牟利嘅領養寵物機構登門探訪。目的，除咗話俾人知我地公司有幾關懷小動物之外，的確可以教育一眾同事救助浪浪們嘅急切需求嘅～同事們仲可以同機構帶上嚟嘅毛孩親近吓、玩吓，都不知幾開心。老闆對於呢個社會責任活動相當支持，可以宣傳公司之外，仲覺得過年前大家都應該輕鬆啲，大讚安排活動嘅部門。但呢個就係問題所在！credit已被其他部門搶盡，阿姐再唔出招刷存在感，過完年封開工利是變報仲得了嘅？

　　阿姐前思後想，決定打出「親情牌」！反正年三十晚都係放早半日俾大家團年，阿姐索性提出家庭日，批准各位在職父母帶同仔女返工！E-mail一出，大家都覺得阿姐靚抽，還擊力唔錯。偏偏阿姐突然看透世事，知道平時勞役得自己部門太多，令我地冇時間出去拍拖或識另一半，原來大半個部門都是未婚的。一諗到年三十晚返工果日我地個部門行出嚟唔夠人多，唔夠威，風頭又俾人地搶左去，就咩good plan都成功唔到。阿姐靈機一觸，向單身一族嘅我地埋手！

　　「喂～你地屋企唔係有養貓狗嘅咩？到時帶埋返嚟公司一齊輕鬆吓吖～」

　　「唔好啦，我隻家貓嚟架，好細膽架，帶佢返嚟又大人、又細路、又其他寵物，我驚佢嚇到心臟病啊。」

　　「影相果陣出嚟一陣咋嘛，驚嘅咪影完放返入籠囉～冇事嘅～」

　　「哈哈⋯我睇吓點喇！」

　　「就咁話喇，我預埋你隻貓貓啦～」