加入最愛專欄  收藏文章 

2020-11-03

《Online有話兒》匿名信教「斜」福樓主席點炒股,黃傑龍:發達係唔啱我㗎

   話說呢兩日財經界有單好笑嘢,不得不拎嚟講吓,就係叙福樓(01978)第二代掌陀人黃傑龍近日收到封匿名信,信入面竟然有一份「發達大計」,唔講以為係《大時代》劇本,搞到佢本人都係自己Facebook上面「些牙」呢份秘笈,仲係個Post到話:「發達係唔啱我㗎。」

 

 

貼1毫子寄信,「斜」福樓主席收件

 

呢份件好似幾急下,唔知寫成「斜」福樓係有心定無意呢?(圖片來源:黃傑龍FB專頁)

 

  呢份件由一位疑似Wong姓嘅經濟科中學教師寄出,信封封面用1毫子郵票都夠晒「騎呢」,然後收寄件地址竟然係「斜」福樓集團收,不過收件人就指明係黃傑龍,下面仲打埋個「URGENT」印仔,Wong老師你都好急吓,唔知「斜」福樓同你有咩關係呢?

 

呢位Wong老師唔通係股神?(圖片來源:黃傑龍FB專頁)

 

  然後信入面呢位Wong老師表明自己成日同家人去「斜」福樓飲茶食飯,從新聞睇到最後一間「斜」福樓停業所以好壞念;但話鋒一轉,轉個頭就講香港股市每日咁大成交,係股票市場搵錢好過做酒樓生意,所以Wong老師就分析咗18隻股票,仲教埋黃傑龍應該點做點做,升幾多倍之後又要開董事會,仲叫埋黃傑龍屋企人大量買入某隻股份!

 

  唔講以為自己睇緊《大時代》,真係嚇死寶寶咩!

 

奇幻電影劇本,黃傑龍Facebook開Post多謝好意

 

由於太過奇幻,所以黃傑龍忍唔住係facebook「些牙」下。(圖片來源:黃傑龍FB專頁)

 

  叙福樓主席黃傑龍係噚晚(2日)係自己個Facebook專頁開Post,話秘書同自己講,有人親手拎咗一份文件要佢親手打開, 雖然集團名改咗「斜」福樓,但係收件人明顯就係黃傑龍,所以佢本人都認真對待。

 

  但發現呢份「驚天發財計劃」之後,佢本人認為「內容實在太超越我嘅常識」,所以就決定公開呢封信內容,最後仲好詼諧講句:

 

  「我諗呢位創作人應該係寫開奇幻電影劇本,多謝你一番好意,你都係留返呢條橋益其他人啦,發達係唔啱我㗎。」

  

  黃主席,你又鬼馬嘅,畀著我就開晒18隻股票名,等大家欣賞吓Wong老師嘅股神功力啊嘛!

 

叙福樓香港老品牌,第二代引入日本餐廳兼上埋市

 

(Shutterstock圖片)

 

  講起叙福樓,我就真係「細細個就聽過呢個名」!酒樓原本由黃耀鏗係1986年以「敘福樓」品牌開始營運,去到1990年就最多擁有33間分店;直到交畀第二代黃傑龍掌陀之後,公司引入多個日本菜品牌,包括「牛角」、「牛涮鍋」等,去到2018年更係香港上市,集資2.6億元。

 

  不過係今年9月時後,黃主席係自己Facebook講,話同領展(00823)積極滑旋下,敘福樓以及相連的MMC牛涮鍋都不獲續約,而呢間天水圍頌富商場嘅叙福樓已經係最後一間,並且經營20年,所以都有點不捨。希望疫情過後,叙福樓可以搵個新地方重新開業,等我呢班茶客仔再去「食好西」啊嘛!  

 

撰文:李皆穎

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

【數量有限】訂閱etnet YouTube Channel,即可獲贈etnet精美筆記本及年曆卡! ► 立即行動

更多Online有話兒文章
你可能感興趣
#理財 #Online有話兒 #匿名信 #黃傑龍 #叙福樓 #黃耀鏗 #牛角包 #牛涮鍋
編輯推介
即時報價
全文搜索
Search
最近搜看
大國博弈
新型肺炎
More
Share