加入最愛專欄  收藏文章 

2021-10-18

《Online有話兒》全世界都缺煤,印度也遭殃?

  話咁快天氣終於轉涼,中國北部溫度突然「斷層式」下跌,搞到要提早供暖,而早前中國煤炭供應緊張係人都知,不過而家仲有個大國突然「無炭用」,講緊係鄰國印度啦!但係點解煤炭蘊藏量全球第四嘅印度都會供應緊張呢?真係耐人尋味啦。

 

 

經濟大反彈,電力供應未跟上

 

 

(Shutterstock圖片)

 

  由於疫情漸趨緩和,經濟逐步復甦,印度各地工廠都開始恢復生產,嘗試彌補返停工時候嘅損失,金融行業人士本來預計經濟可能需要兩至三年慢慢復甦,因此無想過經濟突然V型反彈,加上工廠一下子扯高用電量,令到印度電力需求突然大增,據外地媒體估計,好似馬哈拉施特拉邦(Maharashtra)、古吉拉特邦(Gujarat)、坦米爾納德邦(Tamil Nadu)等地區,今年6至9月電力需求了大漲了約14%-21%不等。

 

  再加上近期國際煤價緊張,雖然印度多數係靠本地煤炭發電,但亦有唔少發電廠係依靠進口煤,煤價急漲令佢地減少採購量,印度每周平均嘅煤炭進口量都比起今年1至7月大跌三成,好似上星期印度嘅煤進口量驟降至150萬噸,創近兩年來新低。

 

印度有幾缺煤?政府資料:半數煤炭發電廠只夠Run3日

 

 

(Shutterstock圖片)

 

  目前印度有七成電力都係依燒煤嘅火力發電廠,咁究竟而家印度情況有幾嚴峻呢?據印度政府資料顯示,係全印度135個煤火發電廠中,有半數嘅煤炭儲存量都少於三日,遠低於政府要求嘅14日標準。假如國內真係發生限電、缺電情況,首當其衝肯定就係製造業,包括水泥、鋼鐵行業一定受影響。

 

  而電力最終都係影響到消費者,有經濟學家表示煤炭單價高昂最終只會令製造產品標價題升,影響到印度出口及本地消費;而部分印度地區好可能已經開始停止向市民供電,先可以維持工廠電力需求。

 

入冬情況或好轉,前煤礦總裁認為電廠需自己儲存煤礦

 

  印度政府已經積極咁為企業提供煤炭,不過隨住冬季開始臨近,而印度又係熱帶地區,相信能源需求會進一步下降,理論上供需失衡都會進一步改善。

  有煤礦前總裁表示,發電廠需要為自己儲存煤礦,而且必須有一定煤炭庫存先可以繼續營運。不過,有幾多發電廠會咁做真係有疑問啦,因為煤炭儲存本身就意味另外一筆支出成本,最後咪又係轉嫁落消費者身上,不如積極研究下再生能源好過啦!

  

撰文:李皆穎

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

【限時優惠】申請etnet強化版MQ手機串流報價服務,加送$50禮券! ► 立即行動

更多Online有話兒文章
你可能感興趣
#理財 #Online有話兒 #印度 #煤炭業
編輯推介
即時報價
全文搜索
Search
最近搜看
內房困局
監管風暴
More
Share