習近平強勢襲港，所到之處生人勿近，警方列陣，半個警隊服侍習一人，封路、趕人、禁無人機，核心保安區史上最大，好彩有張德江舊年為香港人先上一課，令大家好好習慣啊！見到滿街紅旗處處，真係令人熱血沸騰。歡迎字句同慶回歸橫額繁簡齊備，睇唔到前英殖殘餘遺下嘅維多利亞女皇像，望唔到任何反中亂港嘅示威戲碼，只見到中國植入嘅「欢迎习主席」，相信可以令習大大有種家嘅感覺。

 

　　我哋細個喺中史科讀到嘅一幕幕皇帝出巡，沿途唔會有任何蟻民可以接近半步，多謝習大大畀機會廣大嘅香港學生，上一課硬橋硬馬真功夫嘅中史課，實在係國民教育嘅最佳示範。最反動嘅聲音，可能就係有線新聞記者喺停機坪高聲向習核心先生呼叫「何時釋放劉曉波？」事後有傳媒引述當時的職員指，習核心唔回應，係因為佢聽唔到條問題。喂咁當然啦，這個國度每個環節都會自動過濾各方面嘅敏感詞，習近平先生作為國家主席，點可以唔身先士卒，喺腦海裏面自動過濾啲唔應該聽嘅詞語？近年中國科研進程日日飛天，話唔定佢已經設計一套植入腦袋嘅電子程式，可以將所有「民主」、「自由」、「人權」詞語，同埋佢哋困住嘅人嘅名，統統化成耳邊風，「耳風一號」不日面世，唔通佢又話你聽？

 

　　問心，聽日中國收返香港20週年，有邊個人係真心感到高興？

 

　　習近平並不平易近人，反而越見營造山高皇帝遠嘅形象，佢今次來訪，就解答咗點解大陸收咗香港撻地，但收唔到香港嘅心。

 

　　吳光正夠膽講有99.99%香港人嘅生活方式冇改變，我都夠膽講99.99%嘅香港人都對七一呢日提唔起任何開心嘅感覺。

 

　　爭取民主、堅信一國兩制可以真正實行嘅人，年復一年，只有越來越失望，每年到呢日都唔會諗遊樂，只會諗遊行，呢個大家都好清楚。而保皇黨，以至親北京政團，都深知香港同中國再咁行落去，唔會有好結果。因為中國自從十八大以來，就走回一將功成萬骨枯嘅專制狀態，同香港人當初所期待嘅，並無走近，而漸行，漸遠。

 

　　不過咁，小弟就有條橋，睇吓官方肯不肯盡快採納。想香港喺七一呢個日子普世歡騰，年青一輩人心回歸？好簡單架咋，就係叫淘寶天貓一齊喺七月一號推出優惠，攞香港身分證嘅顧客當日消費免運費兼全單七一折，到時肯定香港廣大淘寶客七一全日留喺屋企，理得你習近平入嚟我間屋，定係飛上天際100畀蘋果個記者影近鏡？同埋仲去咩遊行？梗係淘咗寶先啦，集運免費喎！就算人心唔回歸，荷包都回歸咗先，循序漸進，一步步嚟啦吓。

 

　　呢個就係令人唏虛嘅現實，今日大把後生仔，三不五時就會返深圳食海底撈，甚至順便炒吓iPhone，搭高鐵走遍全中國，唔介意京津冀啲霧霾添，但係你問佢愛唔愛國？覺唔覺得自己係中國人？佢會答你：「有得玩就得啦。咁唔通我去得多日本就係日本人咩？」有邊個會Care中國官方嗰套政治忠誠Agenda？但當中國愈著緊，愈鎮壓，愈做得多難睇，亦唔人道嘅事，就連嗰僅餘嘅文化認同感都冇埋，從此就失去咗一整代年輕人。習近平走得愈近香港，香港人同中國就走得愈遠。

 

　　喺呢個咁特別嘅日子，要感謝經濟通畀小弟呢個空間暢所欲言，喺而家呢個歲月，的確係唔容易。無人知道深圳河對岸嘅政權幾時會被挑中，或者黐咗條筋，唔再畀呢個小城一個自由發揮嘅空間。所以，我哋更要堅守身邊每個小空間，小園地，將應講嘅盡講，應該捍衛嘅盡力捍衛，令到香港無論回歸20年，定係200年，仍然係值得我哋香港人驕傲嘅地方。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

全新節目《說說心理話》青少年不可以戀愛！？真實個案講述驚心動魄經歷► 即睇