年尾多個行業都是旺季，打工仔永遠有OT冇準時收工，偏偏為了年尾那分花紅和雙糧，都會沉住氣，堅持不辭職。然而，一些無良公司的賤格老闆亦看透這個道理，在這段期間「有風駛盡（巾里）」，結果「操爆」公司中最不可或缺的經理，鬧走好幫手之餘又痛失金錢。 

　　事緣老闆近來大自然化得好嚴重，時常三更半夜whatsapp 各種大自然道理的文章、勵志過保險經紀的勵志故事以及看完會令人更心煩氣燥的靜心經給經理級以上的Group。由於經理A當時一共「咩」了三個大客上身，本來都已經忙到水都冇時間飲，何來有時間阿諛奉承？偏偏老闆對沉默不表態的經理A的態度特別差，日常豬頭骨工作非經理A莫屬不但止，說話語氣更不留情面！在一次大會中，老闆又再發功： 

　　「呀A你負責個project想點呀？拖咗咁耐點解仲未做完？仲有呢疊單，咩嚟架？應咩酬呀？應酬咗咁多個月你仲想claim錢？食錯藥呀？點解人地果啲project搞2、3個月就完你要搞佢半年？冇得claim！」 

　　「咁我呢個客大少少，跟嘅野多少少，所以時間咪長過人少少囉。其實Raymond佢地跟緊個project 都做緊一樣咁耐時間嘅。最緊要係有成績，最尾番黎賺到錢嘛！」經理A忍住自己道火地回答。 

　　「你有咩資格搵Raymond同你比較？人地出去見客有冇食牛？點解你見客就要食肉？呢疊單都唔知係咪你自己去左玩。我！唔！批！」

　　之後經理A就沉默了，再也沒有和老闆爭辯。會後，經理A打了一通電話，同時，大家都私下狂笑老闆的「大自然論」及「食肉彈單法」。第二日，經理A準時9時走到老闆房，(其實我們都奇怪，老闆點會咁準時返工？一定是有大事發生！)遞上辭職信及一個月代通知金，然後成為眾打工仔的偶像，執包袱走人！經理A走前，沒有交帶落Project的手尾，同Team亦沒有人能補得到經理A的空缺；隔離Team經理就算踩過界幫手，都阻不到骨牌效應的出錯和退單。據悉，經理A經獵頭公司跳槽去了另一間公司；據悉，公司因此賺少了五百萬；據悉，經理A的辭職原因是：「老闆唔比我食肉」。(這只是大家以訛傳訛，尚未證實)不過睇嚟，今年花紅凍過水。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

全新節目《說說心理話》青少年不可以戀愛！？真實個案講述驚心動魄經歷► 即睇