新一屆政府嘅重頭戲之一《施政報告》已發表咗，你以為我哋位特首終於會肯唞返吓？少年你真的太年輕了！林鄭今日又連踩四場喇，佢嘅勤力真係去到全人類都知嘅Level喇，大家諗吓，佢啱啱星期三（11日）先發表完上任第一份《施政報告》，走咗兩日大大小小嘅答問大會、記者會，嚟到今日Happy Friday都仲要連踩一個電台節目加三場活動，「工作狂」之名當之無愧！

 

林太一講起老公就甜笑低頭玩筆。

 

由朝晚未停過 記者跟到金睛火眼

 

　　就等Jenny為大家數數林鄭今日個行程，朝早八點率先出席港台英文台嘅「峰煙」節目解釋《施政報告》；轉個頭十點半未到已經出現喺灣仔會展，為香港貿發局香港秋季電子產品展致辭，仲喺會場行咗一陣先離開；唞順條氣，下晝四點半就去九龍灣國際展貿中心出席世界客屬第29屆懇親大會做演講；食過晚飯，都仲未可以輕鬆下，晚上七點半去返金鐘喺公共專業聯盟十周年晚宴度講兩句，先至叫做結束「牌面」上嘅一日行程。

 

　　林鄭鍾意事事落手落腳去做，佢自己可能就唔覺得辛苦，甚至好樂在其中添！不過就苦咗一班跟住佢周圍走嘅新聞官同記者行家喇！你知啦，唔係個個都好似林太咁有精力㗎嘛！有行家仲同Jenny呻，為咗呢幾日追訪《施政報告》相關新聞日日OT，仲要失眠添！唉！小妹又點會唔明白呢，I know that feel bro！

 

 

 

連任先要問老公拎Approval

 

　　林鄭似乎都知自己做嘢太上心喇！今日佢出席電台節目時都話，做特首係一個好宏大同光榮嘅使命，所以唔會諗其他嘢。不過，有一個人就會成日都後悔，嗰個就係佢老公喇！林太咁講，係唔係老公詐型覺得佢做咗特首之後太Chur，陪唔到屋企人呢？主持人都打蛇隨棍上問林太，係咪應承咗老公只做一屆？佢話連任與否唔係有冇應承老公嘅問題，而係佢都要問老公拎Approval做多5年先得啊！Jenny留意到林太一講起老公就甜笑低頭玩咗幾下筆，同平日對鏡頭時好Firm好Tough個樣好唔同呢！

 

「不」完又「不」 其實係得？

 

　　咁主持人就問，諗唔諗住尋求連任先？林鄭好玄咁講話作為一個政治人物「You don’t say NO on anything that you are not certain……So let’s leave it……」（不會對不肯定的事說「不」），一連三個「不」，幾符合林鄭嘅Style！皆因佢初上任，已經畀人問會唔會想成為首位能夠做足10年嘅特首，當時佢就話：「Never Say Never！」（從不說不）

 

　　不過林鄭又補充返，話個人嚟講都係想去多啲旅行、睇多啲書咁話喎！Jenny就諗返起，薯片叔叔曾俊華就拍片講過：「五年之後，香港一定會更美好」，而家林鄭又話想去多啲旅行，唔通薯片覺得自己五年後真係有機？ 

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

全新節目《說說心理話》青少年不可以戀愛！？真實個案講述驚心動魄經歷► 即睇