仍在奮力懺悔中......

 

　　當我以為，經歷咁多事之後，無論新舊泛民，都已經準備好，未來嘅議會路唔會再係好似以前咁，唔再係謙謙君子之爭，而係爛噠噠嘅泥漿手摔角。當我以為，建制派內鬼撕裂處處，泛民會識得利用增加咗嘅議席去守護好議會僅餘嘅權力。當我以為，非民主黨嘅「非建制派」會更冇包袱，更易轉身。當我以為，9月4號，我手上嘅第二張票，係投咗俾一個可以交託，識得反抗嘅人。原來，一切都只係我以為。

 

　　呢一屆立法會唔會輕輕鬆鬆咁度過，從選舉主任濫權落閘開始，大家都應該要了解。首日會議嘅亂局，各方都本應已做好準備，從建制派敲定俾有國籍問題纏身嘅梁君彥硬上馬，泛民派最資深議員涂謹申應戰，起碼有一星期時間部署。但係，點解梁耀忠當初真係好似無準備咁，就去做主持？單係呢樣嘢，已經夠成個泛民面壁四年。

 

　　梁耀忠坐喺主持大主席選舉呢個位置，旁人當然明白壓力何其巨大，但係就係因為你係其中一個最資深嘅議員（涂謹申計落排第二就係你），點會有可能喺（事後聲稱）立法會秘書處誤導之下，連番犯下大錯？

 

　　在我睇嚟，梁耀忠最大問題有二：第一、冇利用會議主持呢項權力，去處理三名未完成宣誓議員嘅狀態，當中包括下令秘書處盡快同佢哋三人再次監誓，一係就學啲藍屍話齋，將佢哋暫時拒諸門外，唔到你企中立，俾佢哋講嘢但又唔裁決佢哋投唔投得票，你係嗰刻嘅「主席」嚟架！

 

　　第二、冇嘗試去連結泛民，說服建制派用一星期時間，俾各方處理包括誓言及國籍等問題引伸出嚟嘅風波，我重複多次，你係嗰刻嘅「主席」嚟架！千載難逢嘅機會，但就因為梁耀忠同泛民事前冇做溝通，結果釀成一場大災難。以上所講都唔係馬後炮，而係兩星期前已經知道嘅事，點解作為所謂「資深議員」，連基本嘅政治判斷力都欠奉。 

 

　　事後，梁耀忠向各位道歉，話自己令大家好失望，因為未能阻止梁君彥當選主席，星期四嘅記者會就直接將個波拋返俾立法會秘書處。老一輩泛民其中一個老問題，就係將件事play down到有啲細，展現佢哋現實嘅一面，但喺目標方面就南轅北轍，會將件事諗到好理想化。

 

唔少人，包括我，都從來冇諗過係要將梁君彥扯落嚟，因為西環早已預備。所以個重點唔係梁君彥當選，而係剩返嘅三個人好似人質咁被縛喺自己議辦外，肩負重任嘅梁耀忠就會呢個時間走咗去。情況亦好似一個學生要做班長，舊班長發現佢唔識處理，諗住過一兩招，但係呢位學生堅守原則，唔肯接呢個message，最後「攞住令牌當雞毛」，一事無成。

 

　　比較大嘅問號，就係假設佢要休會或暫停會議，同泛民溝通，係咪都唔合乎規矩呢？去到泛民記者會上，顯示出嘅就係支離破碎，民主黨冇出現，其餘黨派合共七個人在場，去到後期演變成長毛同公民黨喺度爭辯星期三發生嘅事。比起建制派舊年大約二十人面對傳媒解釋政改甩轆，更加難睇。咁樣點解旨意你哋團結一致抗港共政權？

 

　　怯，你就輸一世。 呢場係一場激戰，需要硬橋硬馬真功夫，朱凱廸就展現咗魄力，佢話明日佢會繼續跟進梁君彥嘅國籍問題，指出梁君彥展示嘅文件，不確定性仍然有好多。呢種就係真‧積極。

 

　　我唔會否定當日我投俾梁耀忠嘅決定，因為時光倒流，我都係一樣投俾佢，佢為基層努力多年，資歷深厚，喺過去幾年嘅議會抗爭，佢嘅立場亦行得前過民主黨，可以話係不二之選。但正正就係呢兩個原則，成為佢對自己作繭自縛嘅藉口(包括：唔想做罪人趕佢哋三個走。)

 

　　梁耀忠嘅出現， 喺選前，係信唔過民主黨、但唔想浪費超區一票嘅人嘅一個希望。但喺任期第一日，就成為咗香港選舉史上最可惜嘅一件事，亦可能令三十萬票當中嘅好多人，對未來超區一票感到失望，下屆可能變成白票。

 

　　去到呢一刻，梁耀忠可以重新創造嘅政治價值，個人認為得返辭職一途.一來係為呢個過錯真正承擔；二來，令我哋呢一大堆而家懺悔緊嘅選民，個心好過一啲；三來係創造一次公投，俾選民決定，梁君彥可否做主席。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

etnet榮獲HKEX Awards 2023 「最佳表現證券數據供應商」大獎► 了解詳情