收藏文章 

2018-08-14

年輕人恨做政府工?係愛定係責任呀?係……

  年輕人,到底係乜嘢動力驅使你做政府工呀?係愛定係責任呀?Jenny就話係Work life balance啦!事關政府工人工高、福利好,OT少、大假多,唔駛打份工就好似畀咗成個人畀老細咁,有時間做自己鍾意做嘅嘢,講講吓Jenny都好想而家就去In返份(但小妹依然好鍾意而家份工哦)!

 

 

設計圖片(電影《何者》海報)

 

Google都唔夠政府爭屈居第二

 

  其實而家唔少後生仔都一樣對政府工趨之若鶩㗎!人力資源顧問公司Universum就發表咗個「香港大學生最理想僱主調查」,發現無論讀文理商工,對大家嚟講,最有吸引力嘅僱主都係「香港政府」!連出晒名擁有完美員工福利同埋企業文化嘅跨國公司Google都唔夠政府爭,屈居第二咋!

 

  調查問埋受訪者認為返工最重要係乜,原來有六成四人都同Jenny一樣揀Work life balance;其次係要工作穩定(47%);第三係成就感(36%)。頭兩樣的確就係政府工嘅優勢,唔怪之得之前香港有大學同樣做過類似調查,當時都有近七成人話畢業後有意投身公務員行列㗎!公務員事務局局長羅智光都話過,好多時政務職系招聘嗰陣,平均有成5000幾人爭一個位!

 

人人求「穩定」 沒人敢追夢?

 

  人各有志,有人一心入政府服務市民,確係好事。只不過,個個後生仔一畢業就矢志考公務員,對社會就唔係一件太好嘅事。事關個個都為「穩定」入政府,咪正正就反映咗個個都驚私人市場「唔穩定」、大家都唔敢去追夢囉!!政府呢輪係咁推創科,但係社會風氣咁樣,應該都幾考起楊偉雄局長喇!

 

  政府工唔少賣點都係「穩定」,除咗係指工作環境穩定,工作內容都同樣穩定,冇乜進步空間同挑戰性,做耐咗好易連個人都會冇乜創意。當然有「天之驕子」之稱嘅AO之類,就另當別論啦!

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

etnet財經‧生活App  財智‧健康‧品味生活
【立即下載】  iOS版 / Android版
更多言歸政傳文章
你可能感興趣
#Google #香港政府 #天之驕子 #公務員 #創科 #鐵飯碗 #上班族 #80後 #90後 #畢業
編輯推介
即時報價
全文搜索
Search
最近搜看
25周年慶
施政報告
More
Share