加入最愛專欄  收藏文章 

2019-03-14

【轉工必睇】睇朋友分享,好過搵獵頭搵工!一個Annual Dinner睇出公司文化

  近排一打開Facebook、Instagram等社交平台,各位來自江湖唔同行業嘅朋友都分享咗佢地annual dinner嘅熱鬧時刻。唔理佢地係想留為紀念、定突登post出嚟俾上司睇自己對公司幾投入、幾有歸屬感搏加分。但單憑幾張相,已經略略可以睇到唔同公司嘅文化、財力同員工關係等等,俾有意轉工嘅打工仔,作為參考考慮下簽唔簽不平等條約。

 

 

端倪一:場地

 

  搞得個一年一度慰勞同事為公司辛苦打拼一年嘅annual dinner,一餐有質素嘅公司飯是基本吧。如果朋友分享嘅相片中,公司annual dinner擺酒店或租用成個exhibition hall,有擺酒經驗嘅朋友應該知道,價錢應該唔平,而且公司規模都有返一定程度先夠人擺exhibition hall,所以呢間公司財政都應該比較穩定而且係間大公司,我個人覺得想做鋪定路做「老海鮮」嘅朋友,就可以考慮呢類型嘅公司。不過我曾經見過有朋友分享,公司當年因為唔夠budget,但annual dinner又勢在必行,最終搞左個係酒店只有one bite snacks嘅annual dinner,成為我人生25第一次見嘅「冇dinner嘅annual dinner」。

 

 

端倪二:表演嘉賓

 

  搞得annual dinner緊要有啲外來人嚟表演,先可以激發大家嘅投入指數。熱門特別嘉賓如農夫、Chef Nic等等,除左可以滿足大部分同事之外,同場地一樣,肯唔肯洗錢亦係指標之一。另外,一啲「騎呢」嘅表演嘉賓亦都顯示到公司嘅「玩得」程度。尹光、Captain Nancy等等貼緊潮流又有趣嘅嘉賓,雖然價錢未必貴得過上述熱門嘉賓,但都顯得出貴公司係真係有用過心機去設計個annual dinner,務求令大家開心。咁樣嘅公司,就算冇財力,都有幽默感,唔係一間硬蹦蹦又冰冷嘅公司,相當在職嘅生活會過得輕鬆啲。

 

  但各位見到一種表演嘉賓就要千祈千祈要小心!就係自己公司員工!如果一間公司連表演嘉賓都要迫自己員工抽時間去練,而表演項目又係果種睇到人地會尷尬癌發作嘅傻仔表演,你就知呢間公司究竟有幾極權,在職嘅打工仔究竟要放棄幾多自我先可以生存到。呢種公司,我勸大家都係小心為妙!

 

 

  帶返個頭盔,上述兩點唔係絕對。但起碼各位有意投身某某公司之前,可以上網搵下各現職員工流出嘅annual dinner相片,從而叫做有個根據俾自己考慮下你適唔適合呢間公司。有時,社交媒體上一啲看似無關重要嘅資訊,其實都可以變成職場上一啲有用嘅資料!

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

etnet財經‧生活App  財智‧健康‧品味生活
【立即下載】  iOS版 / Android版
更多花生味辦公室文章
你可能感興趣
#職場 #轉工 #公司文化 #AnnualDinner
編輯推介
即時報價
全文搜索
Search
最近搜看
置業不是夢
More
Share