媒體老闆與三位高層正在會議室開會 ……

 

　　老闆：日報早已賣一份蝕一份，紙價貴人工貴，都算喇，仲要不停比人整比人搞，而家數字狼又高姿態出口術叫全世界封殺我哋嘅全版廣告，咁樣真係好大鑊！

 

日報賣一份蝕一份   （網絡圖片）

 

　　高層 A：其實我哋網上版好多人睇，尤其「郁新聞」，不如仿效外國媒體，將讀者轉為網絡付費訂閱用戶？

 

　　高層 B：我哋幾個傾咗好耐，計過數，而家我哋Facebook有二百幾萬粉絲，假設三成願意付費訂閱，差不多六十幾萬人，如果每人每月比五十蚊，我哋每個月固定訂閱收入估計有三千萬，都好和味！

 

　　老闆：香港人最實際，乜都要攞著數，又怕麻煩，幾鍾意睇都係咁話，無端端要收錢要登記，一定嘈到拆天，轉投其他免費媒體，對手乘虛而入，到時得不償失，唔跪低都唔得！

 

以手機讀新聞已成市場大方向  （借用絡圖片）

 

　　高層 A：咁不如暫時唔好講要收錢，淨係登記？

 

　　老闆：唔收錢都係權宜之計，但讀者人數始終有機會大量流失！

 

　　高層 C：老闆，咁多年我哋都係敵人多過朋友啦，比人整比人搞無乜好驚，最重要係我哋啲料夠爆，讀者就like!

 

　　老闆：頂！鬼唔知阿媽係女人咩？你估咁容易撞到條料又堅又爆？天時地利人和，差一樣就係咁先！

 

　　高層 C：料嘅嘢，睇吓我哋點「做」嘅啫！

 

　　高層 B：社會時事、政策制度，唔係我哋話做就做，何況香港人，有幾關心呢啲嘢？

 

　　老闆：要做，一定係做娛樂圈八卦嘢！要爆，一定係離婚、偷情、分家產！你哋搵人出去踩吓線，最好搵到三幾條、吹得好勁但又未拍到嘢嘅料，分幾隊狗仔24小時睇實，睇吓邊條料跑出就做邊條！

　　　

　　高層 A：咁幾時開始要讀者登記？

 

　　老闆：而家開始放風，一日未有料喺手，千祈唔好硬食要登記！堅料一旦到手，hold 住條料，唔好放出街住，即刻推「唔登記無得睇」！到時個市一定亂班友一定鬧，由得佢哋癲幾日，之後就放條料出街，有圖有真相，只要條料夠堅夠爆，我哋又係獨家，我唔信班友唔即刻登記，最緊要IT睇實啲，backend做足準備，到時唔好死機！

 

　　高層 A / B / C：老闆英明！老闆英明！老闆英明！

 

　　這是一個江湖傳聞，完全未經證實，甚至永遠無法證實，但大家可以當作管理人的故事，一起動動腦筋，假設自己是媒體機構老闆或高層，於面對江河日下的紙媒、競爭慘烈的網媒壓力下，如何突圍。

 

　　以這個傳聞中虛構出來的方案追「讀者登記KPI」，我認為成功率是99.99%！

 

（借用絡圖片）

 

　　何解？因為傳聞中老闆對於自己媒體的讀者非常了解，從讀者心態、內容取材、爆料時序以至內部支援，通通部署精準。

 

　　1.  讀者心態 - 只求一切平、靚、正、堅、爆、快

　　2.  內容取材 - 鎖定娛樂八卦新聞內離婚、偷情、分家產為主打對象，已經贏了一半

　　3.  爆料時序 - 堅料在手，未必要即時刊登，看準時機，一擊即中

　　4.  內部支援 - 瞻前顧後，確保前線豐收的時候，後防穩固足以支援

 

　　看穿了市場需要，策略性出擊，一夜之間四、五十萬人登記，易如反掌，只要多「做」幾條堅爆料，讀者登記人數定然直線上升。新聞主角慘被消費？這點無謂多說，圈內人，身不由己，圈外人，樂此不疲。

 

　　媒體轉型自救，路仍漫長，沒有必勝法，惟有各施各法，尋求妙法。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

etnet榮獲HKEX Awards 2023 「最佳表現證券數據供應商」大獎► 了解詳情