世事政情

2020-08-11

依從遺願低調舉殯曾志偉為亡妻擇日海葬

　　【晴報專訊】曾志偉太太朱錫珍於本月3日在港病逝，曾志偉與兒子曾國祥、曾國猷前晚在大圍寶福山紀念館為朱錫珍設靈，昨早於寶福山舉殯，靈柩隨即送往大嶼山寶蓮寺做法事及火化。志偉表示遵從妻子遺願，低調辦喪事，以及日後積極行善。

（左起）曾國祥、王敏奕及曾志偉昨日低調送別朱錫珍，眾人表現平靜。

　　曾志偉、兒子曾國祥、曾國猷及媳婦王敏奕等親屬穿上全黑素服，昨早八時半到寶蓮寺參加誦經儀式。兩個半小時後，眾人到火葬場完成告別儀式，至中午12時結束後，志偉及曾國祥父子便接受傳媒訪問。

曾志偉見到記者時，雙手合十致意。

　　志偉表示順從亡妻遺願，低調處理喪事︰「我哋兩父子都想跟隨佢（太太）意思，因為佢本身係一個好低調嘅人，而且疫情影響，唔想聚集太多人，所以揀咗個寧靜嘅方式。」他透露太太已患病約十個月，患上幾種癌症，所以她自己及家人都有心理準備︰「個仔好乖一路陪住佢，佢離開時一家人都喺身邊，對我哋嚟講唔算太突然，對佢嚟講亦唔再需要痛苦，我哋最唔想佢痛苦。」

曾國祥電影獎項獻母

曾國祥希望以電影成績，作為送給母親的禮物。

　　曾國祥指母親生前已交代後事︰「媽咪想海葬，一切從簡，我哋會擇日再舉行海葬。」曾國祥早前憑執導的電影《少年的你》奪金像獎「最佳導演」等八個獎項，他說︰「希望係送畀媽咪最好嘅禮物，當日我陪媽咪喺醫院睇直播，宣布我得獎嗰刻佢好開心，大家攬住喊。我希望呢一份係我畀佢有史以來最好嘅母親節禮物，好感恩畀佢睇到我少少嘅成果。」