中美大國博弈不停，看不見硝煙之爭，你來我往，大家都打到損手爛腳，估唔到而家國內科企都有大戰！講緊嘅係騰訊(00700)大戰抖音，有指抖音發現自己平台係微信同QQ分享受到限制，認為構成了違反《反壟斷法》，所以抖音控告騰訊並要求賠償9000萬人仔，究竟前因後果係點呢？

 

(istock圖片)

 

因為騰訊係大佬，所以微信封抖音就係壟斷？

 

(istock圖片)

 

　　目前抖音已經正式向北京知識產權法院提交訴狀，北京法院已經受理，抖音方表示，騰訊通過微信同QQ，限制用戶分享來自抖音嘅內容，構成《反壟斷法》內所禁止「濫用市場支配地位，排除、限制競爭的壟斷行為」，所以抖音要求法院判令騰訊，要立即停止呢類行為，並且刊登公開聲明，以及賠償抖音經濟損失及合理費用9000萬元。

 

　　無獨有偶，係周日（７日）內地政府就公布「國務院反壟斷委員會關於平台經濟領域的反壟斷指南」，顯示中國官方打擊壟斷行為嘅決心，亦顯示出中國科企面臨更大挑戰；加上近期網絡金融平台都受到新規影響，支付寶、京東金融等上的存款產品無預警全下線，唔通真係深層改革？

 

騰訊：指控失實，將會提起訴訟

 

(istock圖片)

 

　　騰訊就梗係唔係省油的燈，一聽到自己被人控告，就立即出份聲明，指控抖音母企字節跳動及相關公司，存在侵害平台生態及用戶權益嘅違法違規行為，將繼續提起訴訟；騰訊指出，抖音透過不正當競爭方式，違規地獲取微信用戶個人信息，破壞平台規則。

 

　　不過抖音反駁啦！話用戶數據並唔係騰訊私人財產，用戶係有權力控制自己數據點用，抖音希望透過呢次訴訟，提醒返用戶權利之餘，又可以釐清平台經濟如何規範競爭，完善反壟斷機制，而且認為騰訊壟斷行為妨礙技術進步及創新，對社會福祉並無裨益。

 

意大利出人命，抖音係歐洲危危乎？

 

(istock圖片)

 

　　雖然香港區就無得玩抖音，但外國風氣就好似繼續熾熱，上個月20日，意大利有一個10歲女仔，係抖音平台上面參加「昏迷挑戰」（blackout challenge），不過就係直播中窒息身亡，呢單新聞震驚全國，亦都令當地數據隱私監管單位介入調查。女仔父母向媒體表示，完全唔知到自己個女做呢類挑戰，當初個女玩抖音都係為跳舞、睇下片咁，點會預計到發生呢類悲劇？

 

　　意大利政府已要求抖音封鎖「無法驗證年齡」帳號，意味著任何無法展示身分證用戶暫時無法上傳影片，亦無法同其他使用者互動，唔知歐洲會唔會跟進成立法規，封鎖18歲以下人士玩抖音呢？要知道，抖音其中一班主力用戶群都係13至18歲為主，可以好大影響啊！

 

撰文：李皆穎

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

etnet榮獲HKEX Awards 2023 「最佳表現證券數據供應商」大獎► 了解詳情