同樣是志偉，一個搞政治、一個搞電視，政治立場相反，但原來同樣愛主持大局，然後大叫打和，SUPER！ 

  

　　搞電視的曾志偉，入行數十載，最著名的對白就是「打和」，無論節目中兩隊人實力、對戰情況有幾咁懸殊，佢都會行出嚟，高音咁叫一聲「唉唔好煩啦，打和」，節目效果得啖笑。

 

　　搞政治嘅胡志偉，入行都將近三十年，一直屬於地區「深耕細作」型，入民主黨多年都代表作缺缺，隨住黨內元老逐步退位，幾年內成為民主黨立法會黨團資歷第二高嘅議員，既係新丁，亦係「老手」，舊年更登上主席之位，可算捱出頭來。但登上黨內高峰未夠嘅，點樣先可以令人記得自己，喺呢個政壇度站穩一個位置呢？喺18號，佢透過明報頭版畀咗一個答案大家，佢提出佔中特赦論，要求林鄭新政府，如果係真係想達成政治上嘅「大和解」，就應該運用《基本法》第48條賦予行政長官嘅權力，特赦所有因佔中而面臨被檢控人士嘅罪行，包括示威者，包括發起人，包括警察，包括七警同朱經緯，總之特赦完就大家happy，社會高高興興，和和諧諧，佔中無發生過一樣！打和！無數！

 

　　今舖，佢終於有一壇令大家都記得佢嘅代表作啦，我真係恭喜佢呀。

 

　　消息一出，Facebook上立即洗版，我開頭以為係假新聞，因為點估到呀志偉咁有「智慧」嘅啫，呢啲咁嘅屎橋都諗到出嚟。講出嚟都諗到，整定係兩面都會狂插架啦，經歷過佔領嘅人點會肯赦免當時犯罪警察嘅罪責？建制而家乘勝追擊咁想透過佔領相關官司，擸多幾個立法會席位返嚟為所欲為，又點會咁易放過佔中人士嘅罪責？而且，兩樣嘢點可能拉埋一齊嚟講？

 

　　更加令我懷疑係假新聞嘅，就係公民黨阿橋同民建聯阿鼎講嘅嘢好似調轉咗咁，阿橋竟然和議呢個建議，認為有助修補撕裂，阿鼎今次竟然清醒，話咁做會損害法治，而我又難得認同佢嘅講法喎，嘩，志偉呢個建議簡直係敢教日月換新天。

 

　　後尾見咁大鑊，阿橋即時轉軚，臨崖勒馬認衰仔，志偉都即刻收掣，唔嗌打和，只能被鋤。一場特赦論鬧劇就此告終。

 

　　胡志偉今次究竟係政治智慧低下，而犯下呢個彌天大錯？抑或係被迫做醜人，要試水溫，睇吓社會反應？喺枱面睇真係無人知道。但需知道兩個月前，「漆黑打人七警」判案後，有一堆建制派建議新特首特赦佢哋，已經畀人插到暈，點解到而家都仲要參考呢個講法呢？個人傾向相信，係胡志偉被曾俊華所帶出嚟嘅「和風」沖昏頭腦，凡事都覺得只要唔正面交鋒，就可以化解矛盾，亦顯示佢視呢一場運動，係民主派用作談判嘅籌碼。

 

　　但係，好重要嘅一樣嘢，佢攞咗參與佔領運動人士嘅尊嚴，去同政權交換，如果政權係落搭嘅，肯特赦嘅，咁換返嚟嘅係啲咩？我諗到啦，就係所有社會運動隨即成為無意義嘅一件事，因為原來抗爭完，係用嚟換取政權嘅不聞不問，同埋唔追究刑責就當無咗件事，和諧至上？咁我相信被告嘅人都真係寧願有尊嚴地坐政治監，都唔想成為和諧嘅籌碼。

 

　　不過，幫呀志偉講返句公道說話，今次佢此言一出，立即令特赦論喺建制派成為要出盡力打倒嘅兩個字，兩個月前有份話要特赦漆黑警嘅人，即刻收晒聲，都算係無意中做咗件好事嘅......

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

全新節目《說說心理話》青少年不可以戀愛！？真實個案講述驚心動魄經歷► 即睇