對於打工仔來說，一間公司，除咗會計部每個月埋數出糧，最重要的莫過於負責打掃清潔的姐姐們！試諗下，如果無姐姐清潔Pantry，堆積喺洗手盆裏嘅食物殘渣只需一個星期，已經可以回收嚟煮一味「一獲熟盆菜」；如果無姐姐清潔洗手間，我諗三日你已經唔想再返呢間公司！所以姐姐之偉大，人人都會孝敬。但係，公司發生咗件事，有同事竟然向姐姐發出死亡警告咁離譜？

 

　　事緣有日清潔姐姐突然行咗入Office眼望望，本身大家都冇留意，以為姐姐只係入嚟清潔。點知姐姐入嚟望嘅次數愈來愈多，而且次次都望住同一個位，開始引起我哋嘅好奇。好奇之下一問：

 

　　「姐姐，你想搵邊個呀？我幫你搵丫？」

 

　　「冇呀，對唔住呀，唔好意思呀！千祈唔好擺係心上，真係唔好意思呀！」

 

　　之後，姐姐就一支箭咁走咗。當時大家都心諗，幫你搵個人都唔係咩難事，呢個姐姐有禮貌成咁嘅？過咗一陣，姐姐又再入嚟眼望望，而我哋對姐姐嘅關注亦愈來愈多。

 

　　「姐姐，你想搵邊個呀？」

 

　　「（手指住）坐呢個位果位係邊位呀？真係唔好意思呀！我唔係有心整亂佢啲嘢架！求下你哋叫佢唔好嬲呀，我都係打工架咋！」

 

　　聽到姐姐咁突然哀求，大家即刻問佢發生咩事。姐姐係衣袋拎出一張A4紙，上面寫有「邊個再搞亂我張枱，立即死！！！」

 

 

 

　　一切真相即刻現身！原來係夜更同事GiGi寫比我哋的留言！因為公司有夜更制，有部分同事需要返夜更。唔使諗，日間同事一定會佔用夜間同事張枱，擺下袋、擺下外賣嘢食、甚至借用一下差電線但又唔記得還。GiGi已經多次係Group同日更通事通牒，要求日更同事收工時還佢一張乾淨完整嘅枱。可惜，你知道收工時大家都總係特別忙，成日都係趕住做完嘢即刻走而無視咗GiGi嘅叮囑。GiGi一惱之下，係朝早收工時擺咗張留言紙畀搗亂嘅同事。當然，大家有返咁上下感情先會講得出咁惡毒嘅說話。但GiGi就萬萬估唔到呢張留言紙，會畀每朝最早返公司的清潔姐姐執咗，仲嚇到姐姐為咗保住飯碗，三番四次走上門道歉。

 

　　雖然最終經大家解釋，以及GiGi親身出現道歉後，誤會得以解除。但其實呢件事正正反映出，平時你枱上放任何新奇有趣的嘢，例如假小強、貌似垃圾的食物等等，都會令到清潔姐姐感到苦惱。下次，臨走前，不如順手將有用嘅嘢收好，方便一下姐姐！ 

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

etnet榮獲HKEX Awards 2023 「最佳表現證券數據供應商」大獎► 了解詳情