公司每逢九月淡季都會去一次公司旅行。話就話為咗鼓勵士氣、挽留人才，實質就畀機會老細捉住把柄，得閒威一威脅我哋班薯仔！每次同身邊朋友講起company trip，個個都會大讚公司人道，仲要勁羨慕我！其實有無人知，去呢個公司旅行所受嘅折磨？喺果5日，簡直係intensive咁集中！而且，仲未計前期精神壓力！ 

前期折磨 

　　你估去公司旅行真係有人幫你安排好、打點晒一切乜？由揀地點開始，已經係一場災難。老細懶公正咁叫大家提議旅行想去邊，其實就諸多限制。例如只可以去亞洲地區、人頭budget酒店連機票$5000之內、旅行國家治安要好等等。(下刪100字……)聽完種種要求，你又諗唔諗到有咩地方可以去呢？都係不外乎韓國、日本、台灣呢幾個地方！最大獲嘅係，老細親自放風：「日本係個唔錯嘅地方。」咦？咁係咪即係唔使再諗？梗係唔係啦！無人提議或者個個都只係提議日本，老細又嫌我哋唔用腦；提議其他地方，又怕Ban老細意見，佢會唔高興！最終，唯有排序提議幾個地方當交功課，但首選提議嘅，非老細口味莫屬。 

進行式折磨 

　　所謂伴君如伴虎，平時係公司對住老細10個鐘已經想死，如今要你對住佢5日4夜，你以為你真係放鬆到？雖然，唔係真係百幾個鐘都要對住老細，但老細為咗顯示佢對大家有幾好，每晚晚飯都會約埋一齊食，佢請！試諗下，血拼緊時間梗係過得特別快，望一望電話原來夠鐘開飯；又或者係theme park排咗一日隊，明明就到你玩，但又就夠鐘開飯。去個旅行搞到晚晚都要仆返去食晚飯，個感覺係咪有啲似曾相識？咪等於平時趕deadline囉！

秋後算帳式折磨

　　去完旅行老細一定同大家講一句：「點呀？叉足電啦喎～今年大家一齊努力！做到條數好好睇睇！」電，係叉到少少嘅，但自此老細起碼會用呢個旅行去威脅大家半年！老細認為「我請大家去旅行，你哋OT一陣、或者跑高少少條數都好合理啫！」所以旅行返嚟，老細對我哋呢班扮工小薯嘅要求總係會無啦啦飆升，工作量亦都無啦啦暴增。當大家開始習慣新要求，到咗下半年，老細又會講：「嚟緊公司旅行想去邊度？想要多啲budget，去遠啲？得！做到條新數我加大家budget！」啫係要求又高咗，又要做死人啦！其實公司請我哋去旅行，咪又係想搵藉口迫我哋賺多啲錢，外人睇以為好筍，其實有得去分分鐘仲慘過無得去呀！

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

etnet榮獲HKEX Awards 2023 「最佳表現證券數據供應商」大獎► 了解詳情