過往專欄

2017-08-10

救張震遠太太「出生天」神秘Yau生是誰？

　　「頭號梁粉」又出事！自從梁振英「升呢」做咗全國政協副主席，話晒都係國家領導人之列。之但係曾經係佢愛將嘅張震遠就依然官非纏身，今朝又畀人塔咗返差館。今朝張太亦拿拿臨去咗轉差館，就畀行家影到一位叫Lawrence Yau嘅人用WhatsApp教張太賣甩記者。呢位Lawrence係乜水？佢應該係一個公關好手、喺傳媒界十分吃得開，仲同張震遠一家都好有淵源，兼夾有情有義、不離不棄嘅！Jenny心目中已有一個人選喇！睇埋落去，一陣話你知！

前商品交易所主席張震遠

「頭號梁粉」張震遠再惹官非

　　有「頭號梁粉」之稱嘅前行會成員兼前商品交易所主席張震遠，今日晨早流流就畀警方拉咗返差館，晏晝就立即喺東區裁判法院提堂喇。Jenny同大家睇返個案情先！根據文件，今次被告除咗張生，仲有商交所嘅前財務總監蔡達英，佢哋都同樣被控一項嘅串謀詐騙罪，二人被控喺2012年5月至2013年5月，串謀詐騙證券及期貨事務監察委員會;另外仲有一項欺詐罪。而家案件就啱啱提咗堂，佢哋兩個暫時都毋須答辯，案件將押後到今個月24號喺區域法院答辯。兩人可以用5萬蚊保釋，但就要交出旅遊證件，唔可以離開香港同埋接觸證人。

　　張震遠呢位「頭號梁粉」咁耐以來官非纏身，但每次都可以逃過一劫，暫時都冇受過牢獄之苦。但今次呢單嘢，控罪比之前來得嚴重，睇來都有排張生煩喇！

張太被記者圍向神秘Yau生求救

　　呢個情況最擔心張生嘅，Jenny斷估唔係CY，而係朝夕相對嘅張太！張震遠老婆駱晶瑩今朝畀行家發現，喺灣仔警察總部附近一個停車場出現，之後拎住文件行去警察總部嗰邊。佢面對記者嘅追問一概封口，仲轉身走咗去金鐘海富中心方向，期間畀行家影到佢一名叫

　　「Lawrence Yau」嘅人不斷以英文傳WhatsApp，大約意思就係問對方可以點樣賣甩跟實自己嘅記者。Lawrence就覆張太，已經同部分傳媒主管單咗聲，希望佢哋唔好再跟，但又強調其中兩份報紙唔會賣帳云云;仲向張太教路，話如果成功擺脫記者，就最好留喺屋企。結果，張太就跳上的士，絕塵而去。

　　好多人都想知究竟Lawrence Yau係何許人也？可以短時間之內，同傳媒高層有計傾，又識得教張太成功避開記者？仲提供埋之後點做嘅意見，一定係一個好勁嘅人，仲要係首屈一指嘅公關大人物。Jenny思前想後，估計佢最大可能就係前市建局企業傳訊總監邱松鶴，唔知Jenny估得啱唔啱呢？Lawrence亦都喺機管局、貿發局同無綫電視做過，公關技巧確係有一手㗎，所以喺短時間之內，只靠WhatsApp就令張太重獲自由，Jenny真係要畀個「勁」佢！