過往專欄

2017-08-09

興德之亂不比大台劇差國慶音樂會有Oppa

#Oppa #INFINITE #國慶 #青年音樂會 #文藝晚會 #68周年 #慶祝活動 #興德之亂 #校政專家 #陳章萍 #興德學校 #國民教育

　　屯門興德學校嘅「興德之亂」，真係好睇過大台嘅「師奶劇」，令Jenny追到欲罷不能！今日又有新發展，被教育局委派入去該校做校董嘅「校政專家」雷其昌講返開校董會嘅荒謬情況，亦忍唔住要講句:「都係第一次見！」、「唔知點收科」。

今次興德學校校長陳章萍可能會被教育局「釘牌」，新學年學校可唔可以順利開學係大家關注嘅焦點之一。

「興德之亂」蔡副局上任第一挑戰

　　而家教育局已確認該校有「影子學生」，仲懷疑有偽造文書，差人同廉署已經調查緊。估唔到教副局長蔡若蓮上任第一個挑戰，唔係推行國民教育，而係呢場「屯門興德學校風波」。蔡副局同Jenny講，已將相關資料轉交警方調查，又話興德學校唔係面臨縮班殺校，本身唔使「數人頭」，今次事件之後，局方會研究下，第時如何優化監察，包括抽樣為學校「數人頭」。

　　而「校政專家」雷其昌今朝早出席港台嘅節目，佢話校長和管理層其實應該做中間人的角色，調解校內紛爭，點知興德學校長陳章萍的做法就令到佢嚇餐飽。

　　話說，當日佢受命要處理呢一盤混帳，睇下可唔可以拆得掂，點知去到間學校嗰時，冇投訴嘅老師擺明車馬，話唔想見到嗰班走去投訴嘅老師；家長又舉晒牌，話唔歡迎班投訴校長嘅老師。面對當時咁立立亂、水火不容嘅情況，作為見慣風浪嘅雷生都話驚驚，因眼下真係唔知點收科！

「出現」唔「出席」校政專家都O咀

　　當佢去到開校董會會議嗰時，雷生都要嘆一句:「咁有趣嘅現象，在我呢生人中，參與過咁多校董會都係第一次見。」事關校董會成員之一嘅陳章萍喺現場，當時就係差佢一個人就夠人數開會，點知有趣嘅地方，係陳校長當日無錯係「出現」咗呀，但就話唔係「出席」會議，因佢拎咗病假喎，但轉個頭佢就竟然變身評判，同班校董講人數不足要流會。Jenny幻想到當時在場嘅所有人表現應該都係O咀樹熊咁！雷生話，整體校政暢唔暢順，其實都好睇校監做成點，要唔好畀校長利用，一旦校長過分集中權力喺身上，就有校政危機㗎喇。Jenny一聽簡直覺得係大智慧，皆因處理校政同特區政府施政何嘗唔係殊途同歸！

Jenny幻想到當時雷生應該係咁嘅樣望住陳校長。

小明好風騷棋哥因乜事勞嘈

　　追完「興德之亂」，唔知大家有冇興趣睇下表演呢？中華人民共和國成立68周年慶祝活動又嚟喇，籌備委員會今日就慶祝活動嘅詳情、地點等，咁多事務喺唔使廿分鐘就表決通過晒！效率果真奇高。今日見「小明」張曉明依然好風騷，致完辭就閃人，捉都捉唔住。留低政協常委陳永棋(棋哥)同一眾行家吹吹水，一聽到近日熱門關鍵詞「一地兩檢」，棋哥就話反對人士「好奇怪！」仲要講足三次！棋哥愈講愈興起，仲爆咗句「(因一地兩檢)拉布啲人都係精神上有啲問題！」Jenny同行家一聽眼都凸埋！棋哥唔知係咪都Feel到自己講多咗，講完呢句就話「好喇！我要走喇！」急急腳閃人囉！

棋哥爆咗句「拉布啲人都係精神上有啲問題！」Jenny同行家一聽眼都凸埋！

想見Oppa？奉上紅衫魚一張吧！

　　不過呢啲都唔係重點，Jenny嘅重點係今年國慶將會喺紅館搞嘅嗰兩場表演，一場係國慶當日嘅文藝晚會，另一場就係第二晚嘅青年音樂會。呢個國慶青年音樂會除咗有中港台嘅明星之外，仲請到韓國組合INFINITE過嚟賀一賀！Jenny梗係要去呢個青年音樂會捧場啦！嗱！文藝晚會係免費入場，市民只需要喺全港18區攞飛就得，但青年音樂會就要承惠100大元一張飛嘅。蔡會長同Jenny解釋，因為擔心有人拎咗飛又放飛機，所以要收錢。

　　國家果然深知我哋香港年輕人嘅喜好噃！咪住先，祖國之前唔係有個「限韓令」咩？韓星表演會唔會最後都唔成事㗎？到時一眾Fans抱「票」痛哭就唔好啦！蔡會長即刻叫Jenny唔使驚，皆因而家「國家嘅外交方面好好」，人哋國家嘅人都願意嚟我哋呢到祝賀，梗係Welcome啦，仲話表演節目今年加咗碼，INFINITE會唱足5首歌啊！有蔡會長呢句，Jenny就放心去搶飛喇！Oppa我嚟喇！