大家在學時期個Group Project撞到啲咩人最閉翳呢？計Jenny話就梗係Deadline Fighter啦！事關佢明明有充裕嘅時間做嘢，但係就成日都喺交功課臨尾幾日先開始做，如果同呢種人做組員，唔到臨匯報嗰一刻都唔知佢做咗啲乜，變相小妹就要作兩手準備，做埋佢嗰份先敢瞓！不過而家Jenny發現Deadline Fighter無處不在，最新一例就有我哋嘅政府喇！講緊嘅係傳得沸沸揚揚嘅「DQ姚周」。

 

 

姚松炎話仲未接獲任何來自選舉事務處相關通知，昨日(26)率先喺fb出圖叫政府盡快交待。(姚松炎專頁fb圖片)

 

The show must go on

 

　　是咁的，今次立法會嘅補選提名期就得兩個星期時間，下星期一（29日）就係最後一日嘅報名日嚕！之前民主動力幫民主派協調出嚟嘅初選，就因為九龍西嗰邊，民協馮檢基（基哥）走佬唔做「Plan B」，搞到傳統泛民同自決派面左左咗一排，不過The show must go on，民主動力前日都出嚟講會跟返機制，若果姚松炎被DQ，就由得分第三嘅民主黨袁海文做Plan B，民主黨噚晚都開完會Confirm咗件事，而家就剩低究竟姚係唔係真係被DQ啦！

 

　　DQ呢件事一直都傳得沸沸揚揚，但係一直都未有一個好確實嘅講法。直至今日，好多份報章都彈出來，引述消息話，選舉主任會喺下星期一，即係提名期完結前先通知姚松炎同香港眾志嘅周庭會被取消參選資格。咁Deadline Fighter Feel嘅？！Jenny聽聞有關方面諗咗好耐先諗到個DQ理由出來，不過就唔知係唔係因為咁所以就臨到截止日先正式宣布DQ姚周喇！

 

港島「Plan B」區諾軒 Judy策略就要變

 

　　不過民主派都熟知政府嘅脾性，今次蠢唔晒，一早做定兩手準備，雖然中間做得核突咗啲。九龍西一輪鬧劇之後，終於決定推袁海文做「Plan B」。港島區雖然冇初選，不過周庭都同Jenny確認過係有「Plan B」人選，兼且已獲民主動力嘅支持，而嗰個人仲係大家都識嘅添！就係區諾軒喇！咦，知名度仲高過袁海文噃！

 

　　時間咁「掹」除咗影響組員，仲影響埋對手個部署。Jenny就問左葉劉淑儀（葉太）兩句，話晒愛徒陳家珮(Judy)原本個對手周庭可能會被DQ吖嘛，睇吓佢有冇收到咩通知做定事先部署，葉太就答得都好隱晦，只係同Jenny講話如果其他候選人有變，新民黨會即時調整策略咋。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

etnet榮獲HKEX Awards 2023 「最佳表現證券數據供應商」大獎► 了解詳情